РУСНАК ИНФО

   У рамикох промотивней кампанї за уписованє до окремних виберанкових спискох Националних совитох, министер за людски и меншински права у Влади Републики Сербиї др Светозар Чиплич, нащиви Национални совити Бунєвцох, Горватох и Мадярох у Суботици, 03. и 04. фебруара, Национални совити Нємцох, Словакох, Румунох и Українцох у Новим Саду 05. и 08. фебруара и Национални совит Русинох у Руским Керестуре 09. фебруара 2010. року.

   Нови Закон о Националних совитох националних меншинох у Републики Сербиї ступел на моц у септембру 2009. року и од того датуму чечу пририхтованя за виберанки нових Националних совитох котри ше маю отримац концом мая/початком юния 2010. року.

   Уписованє до окремних виберанкових спискох тирва по 09. март 2010. року и орґанизовани є у каждей општини . По оконченю упису орґанизую ше виберанки за нови Национални совити националних меншинох дзе ше обчекує учасц коло 800 тисячи гражданох Сербиї котри ше вияшнюю як припаднїки националних меншинох. У виберанкох будзе участвовац 19 Национални совити и вони буду орґанизовани на цалей териториї Републики Сербиї, у шицких 167 општини а на найменєй 9 язикох, по двох виберанкових системох.

   По датей реґулативи шицки меншински заєднїци муша орґанизовац виберанки по нових правилох, а дата и нагода за формованє нових Националних совитох, котри маю право дзйствовац у обласцох култури, образованя, хаснованя язика и информованю.

   Коло постояцих 16 Националних совитох, нагоду за формованє свойого Националного совиту, по новим Закону, вихасновали и Албанци, Ашкалиї, Чехи и Словенци  котри тераз першираз вихасную свойо право на тоту файту орґанизованого дїйствованя и участвованя на виберанкох.