РУСНАК ИНФО

На трецим по шоре Конґресу русинского язика, 2007. року, у Кракове (Польска), єдно зоз заключеньох и континуоване отримованє и розвиванє контактох науковцох, професорох и педаґоґох руского язика медзи русинскима/рускима/лемковскима енклавама (Польска, Словацка, Україна, Мадярска, Канада, ЗАД, Горватска, Сербия и др.). Ґу тому, за представителя войводянских Руснацох за реализацию того заключеня вибрани проф. др Михайло Фейса. Потреба за контактами тей файти нєдвосмисллово висловена и на ювилейним, 10. Конґресу Русинох/Руснацох/Лемкох, у Руским Керестуре, т. є. на Конґресних комисийох за просвиту и културу. Професор Фейса и представитель войводянских Руснацох у Интерреґионалней комисиї за кодификованє русинского язика.

З тей нагоди, а у духу реализациї догвареного, проф. др Михайло Фейса, у сотруднїцтве зоз ОШиҐ Петро Кузмяк, орґанизовал културно-едукативну екскурзию до Карпатского ареалу, точнєйше до Прешова, Хмельовей, Бардейовских купельох и Медзилаборцох у Републики Словацкей.

У Прешове, всоботу до поладня, 26. септембра, Будаи Янош, Ґовля Наталия, Ґовля Тат`яна, Дудаш Биляна, Йовович Ново, Колєсар Мелания, Маґоч Владимир, Недич Анто, Недич Иван, Неваляни Юлиян, Русковски Силвестер, Сакач-Фейса Мария, Силадї Тат`яна, проф. др Фейса Михайло, Чельовски Славица, Чельовски Цецилия и Штрбац Предраґ нащивели Грекокатолїцку архиепископию и митрополию. У цеку розпатраня Архиепископиї и митрополиї госцом отримане своєфайтове преподаванє о историяту тей за Руснацох окреме значней институциї. По тим, орґанизоване приманє 17-членней делеґациї у просторийох Русинскей оброди, утвердзени дводньови план и програма и зоз винїмно любезну домашню, Силвию Лисинову, вичерани русинистични публикациї и водзена барз конструктивна розгварка у смислу ширеня дальшого сотруднїцтва.

У пополадньових годзинох госци зоз Сербиї змесцени до пансиону Ивонис. По полудзенку млади шпиваче, Тат`яна Ґовля и Иван Недич, хторих порихтал Дом култури Руски Керестур, конкретно Юлиян Рамач Чамо, мали ґенералну пробу, же би непостредно по нєй, вєдно зоз коло 40-ерима дзецми основношколского возросту зоз шицких русинских центрох, наступели на Ґалаконцерту Писнї мойого роду, хтори орґанизовани у рамикох манифестациї Хмельовки днї хлєба. Ґалаконцерт бул ревиялного характера, а нашо представителє-шпиваче зоз своїм наступом виволали огромни аплауз. Громогласни аплаузи публики на вецей заводи воволал фолклорни ансамбл Гемлон зоз Гуменого. У рамикох цаловечаршей програми проф. др Михайло Фейса подзековал домашнїм и уручел дарунки - дзецом кнїжки, а Мартинови Карасови, предсидательови Форума младих Русинох/Руснакох/Лемкох две литри домашнєй. По програми госцох прияли орґанизаторе Хмельовских дньох хлєба, представителє места Хмельова и подружнїци Русинскей оброди у Хмельовей. Ґу госцом ше обрацел и уручел им прогодни дарунки староста Хмельовей особнє. И модераторка програми мр Марияна Желєзна подаровала свой найновши компакт-диск зоз народнима шпиванками у своїм интерпретованю. Додайме и то же Манифестация софинансована и з боку Министарства култури Републики Словацкей, чий представитель бул тиж присутни.

Хмельова и карпатске околїско дїйствовали барз креативно на дзепоєдних членох делеґациї, окреме на Биляну Дудаш, студентку ґрафичного дизайна, и Юлияна Неваляного, хтори станули на вчасни ранши годзини и ловели перши зарї слунка на схилох Карпатох. Обдумана и вистава фотоґрафийох Юлияна Неваляного роботней назви Швитанє над Хмельову, хтору КПД ДОК - Коцур унєше до своєй програми.

Нєдзельове дополаднє 27. септембра пошвецене обиходзеню реномираного одпочивалїща Бардейовски купеллї, а пополаднє обиходзеню Медзилаборцох. Бардейовски купелї, а окреме древена Гркокатолїцка церква, хтора у тей хвильки була преполна з вирнїками, розпатрени у власней режиї. Медзилаборци на очаруюцо госцолюбиви способ госцом представел предсидатель Русинскей оброди особнє, п. Владимир Противняк. Як прави водич-кустос вон виложел историят Медзилаборцох у найкратших рисох, и водзел госцох перше пред Грекокатолїцку и Православну церкву, а потим до Музею Ендия Воргола. Фасцинирала упутеност Владимира Противняка до уметносци Андрия Варголи, алє вона була цалком розумлїва по спознаваню фактох же його супруга у родзинских одношеньох зоз икону поп-арта, и же вон особнє орґанизовал виставу пошвецену шветово славному уметнїкови дзень пред Револуцию, хтора Русином принєсла право на идентификацию и розвой своєй култури, цо им було вулґарно утаргнуте у чаше Сталїнового режима.

До розходу зоз любезним домашнїм пришло у вечаршим годзинох кед предсидатель Русинскей оброди подаровал комплет виданьох орґанизациї хторей є на чолу шпивачом-учаснїком, Тат`яни Ґовльовей и Иванови Недичовому, и представительом Руского Керестура и Коцура, Наталиї Ґовльовей и проф. др Михайлови Фейсови. Госци поволали членох Русинскей оброди же би вжали учасц у реализациї предстояцих проєктох КПД ДОК - Медзинародни шаховски и пикадо турнир Яша Баков, Медзинародни фестивал гумора и сатири Коцурска чутка (конкретно зоз виставу карикатурох познатого карикатуристи Федора Вица) и Подобово-литературну колонию Ерато над Куцуром/Коцуром. Професор Фейса замодлєл и одвитуюци преглядни прилоги за його проєкт Русини/ Руснаци/Ruthenians (1745-2005).

Єдногласна оцена шицких госцох глаши: успишне, хасновите и нєповторлїве.

Културно-едукативну нащиву Карпатскому ареалу, як вид медзинародного сотруднїцтва, потримали Национални совит рускей националней меншини и Дочасови орґан Скупштини Општини Вербас.