| |
ХТО СЦЕ РОБИЦ, А ХТО НЄ?
Олена
Папуґа
Схадзка Националного совиту Руснацох (як го ми у народзе воламе) хтора
отримана всоботу, 18. октобра у зборнїци керестурскей школи, отворена зоз
бешеду др Якима Сабадоша хтори замодлєл членох же би вецей нє хасновали таки
форми обходзеня, роботи и комуникованя яки дотераз хасновали прейґ новинох,
зоз одходами до орґанох власци, бо вони принєсли лєм вельки чкоди.
По словох др Сабадоша у Совиту вецей нє шму постояц лїстини, два ґрупи, алє
Совит муши вєдно робиц и наступац, а тоти члени хтори думаю же нє можу робиц
у тей заєднїцкей ґрупи най ше вияшня о тим, а добре би було и кед би ше, у
случаю же нє можу робиц так як вимага Совит, най ше зоз нього поцагню.
На тоти слова ше надовязали преволани др Юлиян Рамач, Янко Голик, та Ирина
Папуґа виражуюци нєзадовольство же ше у Совиту роби на свою руку, же пред
електорску скупштину “подписи зберани нєлеґално”, а др Рамач и Голик окреме
визначовали же ше предсидатель Русковски справує у стилу “держава то я” же
нє указал велькодушносц и добру дзеку за мир. Янко Голик ґу тому шицкому
додал и стару, вичерпану думку же нас Русковски сце поукраїнчиц, а Ирина
Папуґа визначела же ю болї же Русковски людзох нє вола по їх особних менох и
презвискох, алє наздзива хаснуюци слова “нина, андя, бачи...”, же члени з
“А” лїстини порихтани на найгорше, та и на линч тих зоз другей лїстини.
Конєчне слово на тото положел Звонко Сабо предкладаюци членом Совиту най ше
явно, зоз дзвиганьом руки вияшня, чи Ирина Папуґа, Янко Голик, др Юлиян
Рамач и Рафаил Русковски, маю довириє других членох Совиту. Довириє достал
лєм Рафаил Русковски (13 гласи), а тройо наведзени члени нє достали
потримовку, цо нє значело же су вируцени зоз Совиту, алє то их морална
обовязка, односно на нїх ше стої чи и надалєй буду члени Совиту, понеже им
нє дата потримовка.
Конєчно, по дньовим шоре
После годзини, Совит конєчно утвердзел дньови шор, та винєшени податки о тим
цо поробене у прешлим периодзе, и мож повесц же активносци Совиту були добри
и вельочислени, бо окончени велї нащиви дзе Совит представени, финансовани
манифестациї, купени дом КПД “Карпати” у Вербаше, закончени дом у Дюрдьове,
дата потримовка за школованє студента на рускей катедри...
Звит о потрошених средствох поднєсли представнїки зоз културно уметнїцких
дружтвох, та прилапени тот зоз Шиду знагоди 200-рочнїци приселєня, зоз
Лєтнєй школи у Фекетичу, “Коцурскей жатви”, а финасийни звити о преслави
250-рочнїци образованя и фестивала “Червена ружа” буду поднєшени на
шлїдуюццей схадзки.
Владимир Тимко зоз Дюрдьова дал заувагу же би ше Национални совит нє мишал
вшадзи, односно най нє кладзе ложку вшадзи, бо людзе хтори роками робя
роботи такей файти заш лєм знаю робиц, и же их нє треба бунїц. Вон тиж
визначел же у Дюрдьове вельки национализем, же КУД “Тарас Шевченко” нє
достава средства анї од Месней заєднїци, анї од Општини Жабель, та су
препущени сами себе и боря ше зоз проблемом финасованя и национализма.
Конкретне предкладанє дала и Ирина Папуґа о тим же ше Национални совит ма
бориц за врацанє национализованих будинкох, а хтори адкеди припадали нашим
културно-уметнїцким дружтвом.
Национални совит нє ма пенєжи
Як визначел предсидатель Русковски пенєж Националного совиту подзелєни и вон
хвильково нє ма пенєжи, алє ше очекує же 500 тисячи сцигню, так же на тот
завод вимоги за средствами нє одбити, алє ше о нїх будзе розправяц док будзе
пенєжи.
Совит ше тиж остарал же би єдини студент на Катедри за руски язик Зденко
Лазор зоз Бикичу достал змесценє у студентским доме, и реални трошки
путованя дому раз до тижня.
24.ОКТОБЕР 2003. РОКУ
ЧИСЛО 42 (3026)
|
|