|
Интервю зоз министром
вонкашнїх дїлох
Почитовани панє Паук модлїм Вас же би сце одвитовали на даскельо питаня за читательох веб сайта www.rusnak.info зоз Себиї.1. Робота министра вонкашнїх дїлох нє лєхка, окреме у ситуациї кед Република Подкарпатска Рус нє припозната зоз боку медзинародней заєднїци. Модлїм Вас же би сце нам пояшнєли яки проблеми маце зоз боку українских власцох? Лєм з боку українских власцох и маме основни проблеми. Власц України од приношеня "Плана мирох за ришенє питаня Русин-Українєц" 1996. року завжала злодїйске положенє и так ше справує. "План мирох ..." основа и ришенє русинского питаня зоз точки патреня України. 2. Яку потримовку маце од русинских орґанизацийох Подкарпатскей Руси? Чераме информациї зоз шицким русинским орґанизациями и координуєме акциї у зависносци од хвилькових позицийох українских власцох. Коло того маме барз моцну моралну потримовку без хторей би було барз чешко спроводзиц русинску политику. 3. Яку потримовку маце од русинских орґанизацийох у загранїчю? У основи потримовку маме од русинских орґанизацийох чийо члени походза зоз Подкарпатскей Руси - Чешкей Републики и Росиї. Сотрудзуєме и зоз русинским орґанизациями Мадярскей, Словацкей и Сербиї. 4. На яки одгуки наишли Вашо писма за помоц зоз жемох дзе жию Русини? За тераз лєм на особним уровню. Открито нас потримали русини зоз Росиї и Сербиї. 5. Знаме же ше рихта перши Шветови Конґрес Подкарпатских Русинох. Пре цо ше орґанизує тот Конґрес? Главна причина то же би ше дала потримовка успоставляню державносци Републики Подкарпатска Рус. Републики Подкарпатска Рус преглашена 1. децембра 2008. року як мацеринска держава шицких русинох швета. 6. Вельо Русинох зоз других жемох потримую Вашо намаганя и нє складаю ше зоз заключенями котри ше приноша на схадзкох Шветовей Ради и зоз порученями предсидателя ШР Павла Роберта Маґочия. Чи нє думаце же формированє ище єдного Конґресу може буц контрапродуктивне за русинох у Подкарпатю зоз оглядом на то же ше у юнию у Сербиї отримує 10. Шветови Конґрес Русинох/Руснакох/Лемкох и же ше ище нєзна яки буду заключеня того Конґресу? Конґрес П.Р. Маґочия нїґда ше нє вияшнєл и нє вияшнї ше за воспоставянє русинскей державносци цо указую 18 рочни намаганя алє без резултату. Пре то русини у України осудзени и то основна и главна причина нєсоглася зоз П.Р. Маґочийом. 7. На 10. Конґресу РРЛ будзе отворене и питанє положеня Русинох Подкарпатя. Яка, по Вашим думаню, будзе тота конґреснеа розправа? Думам же, скорей шицкого, будзе оценєне же зме радикални и будзе обструкциї. Ми порихтани за таки розвой ситуациї алє увидзиме цо наисце будзе. Присц на даскельо днї до Подкарпатскей Руси на екскурзию и жиц ту, чувствовац на своїм хрипце гнєт и українску дискриминацию, зложице ше, два барз розлични ствари. Заключки 1. Конґреса Подкарпатских Русинох вименєли русинску идею и ширя ю. Гоч яки заключеня да принєше 10. Конґрес РРЛ вони нє ослабя нашу позицию и намаганя за спасенє русинского народу у Подкарпатскей Руси од українского етноцида. 8. Интересує нас и чи маце даяки урядово контакти зоз Парламентом Евросоюза? Розгварки зоз поєдинєчнима посланїками Европарламенту маме а зоз самим Парламентом ище нє витворени. 9. Знаме же нєдавно на Подкарпатю була членица Европарламенту Татьяна Жданок та нас интересує о чим сце бешедовали? Начално, розгварки були о вишлїдзованю русинских активистох з боку українскей служби безпечносци, порушованє питаня интересох русинского народа у парламенту ЕС и медзинародних судох. 10. Чи маце даяке порученє за Русинох у Сербиї? Сцели би зме посцигнуц ище цеснєйши контакти зоз русинским орґанизациями у Сербиї у шицких сферох. Дзекуєм на одвитох Дзекєм и я вам на ошвицованю подкарпаторусинскей тематики на вашим сайту. Розгварку водзел Мирослав Силадї
|