РУСНАК ИНФО

Русини у нащиви амбасадом у ЗАД

Вашинґтон, ЗАД.
 

4-5 юния 2008 року предсидатель Шветового конґресу русинох професор Павло Роберт Маґочи вєдно зоз делеґацию америцких русинох нащивел  амбасади України, Румуниї, Сербиї и Горватскей у Вашинґтону.

У делеґациї коло проф. Маґочия бул Джон (Иван)Риґети, предсидатель “Карпаторусинского товариштва” и члени главней филияли: Лари Бриндза, професор Елейн Русинко та Кристи Слифкей.

У амбасади Румуниї делеґацию приял Амбасадор Космин Вєритою. Професор Маґочи го поинформовал о успиху Дзевятого конґресу русинох, котри ше одбул у месце Сиґет, Румуния 21-24 юний 2007 року, а тиж подзековал и за цепли приєм представнїкох Шветовей ради у Парламенту Румуниї у фебруару 2008 року. Делеґация американских русинох висловела и свойо нєзадовольство пре то же месни власци у Сиґету ище нє положели спомин плочу на мур дакедишнього окружного суду дзе ше 1913-1914 року судзело православним русином. Амбасадор висловел свойо обецанє же при власцох у Букурешту пороби шицко цо у його моцох же би ше ришел тот проблем.

У амбасади Горватскей карпаторусинска делеґация ше стретла зоз Першим Секретаром Сандру Штетич. Професор Маґочи поинформовал Першоґо Секретара о тим же ше дзешати шветови конґрес русинох, у єдней часци, отрима и у Горватскей, у Петровцох, 6. юуния 2009 року. Предсидатель Шветового конґресу тиж уручел урядове питанє вязане за статус  националних мешинох у Горватскей, тй. чи припаднїки националних меншинох маю обовязку вияшнїц ше котра им матична жем споза гранїцох Горватскей. Окремне онєспокоєнє виволує статус Товариштва “Руснак”, котре репрезентує русинох Горватскей. Професор Маґочи глєдал и официйне вияшнєнє чом Товариштво “Руснак” нєма право директного контакту зоз державнима орґанами алє прейґ українско ориєнтованого Дружтва русинох и українцох Горватскей.

У амбасади України делеґация була уш треци раз за три роки а приял ю Олександр Александрович.  Делеґация висловела вельке нєзадовольство пре то же ище нє достали одвит на питанє чи “План ришеня проблема українцох-русинох” зоз 1996 року ище активни. Водзела ше и интересантна розгварка пре нєдавни подїї коло припознаня русинох за окремни народ.

У амбасади Сербиї предсидателя Шветового конґресу и делеґацию приял Окончователь Роботох Владимир Петрович и перши Секретар Дєрдь Маткович.

Делеґация поинформовала Амбасаду же ше Дзешати конґрес русинох, заплановани за наступни рок, отрима у Руским Керестуре, алє и же то будзе перши у независней држави Сербиї. Пан Петрович виражел свойо подзекованє за информацию, а тиж так обецал же пороби шицко цо у його моцох же би конґрес бул успишни. Окреме обецал обеспечованє визох делеґатом за уход до Сербиї.

Професор Маґочи поставел и  питанє же чи у Сербиї меншински народ муши мац “мацеринску жем” же би мал право на статус националносци.