|
МЕДЗИНАРОДНЕ СОТРУДНЇЦТВО На поволанку предсидателя Русинскей Меншинскей Самоуправи у Будаоршу (часц Будапешту) пана Ґабра Хатинґера Хлебашка, прешлого викенду (24.-го и 25.-го априла) у нащиви Мадярскей були чолни особи двох наших Дружтвох и медийох. Будаорш нащивели пан проф. др Михайло Фейса, опрез КПД "ДОК" и Миломир Шайтош опрез "МАТКИ-Дружтва Руснацох Нового Саду-Войводини", як и пан Мирослав Силадї, главни и одвичательни редактор Руского Интернет Радия и власнїк веб сайту "Руснак Инфо". Главна причина нащиви Будаоршу була розгварка и порада коло хаснованя приступних финансийних фондох Европскей униї, а хтори ше можу хасновац у обласци култури и информованя. Гоч Сербия нє член Европскей униї, заш лєм єст можлївосци же би, прейґ одредзених проєктох, хасновала финансиї зоз тих фондох. Пан Хатинґер упознал своїх госцох зоз Сербиї зоз способами приступу фондом Европскей униї, а понеже вони указали интересованє за таки способсотруднїцтва зоз Европу, под час того роботного викенду уж окончени одредзени конкретни крочаї и поради же би и нашо Дружтва, хтори то сцу и нє обаваю ше, вжали за себе часц того европского "колачу". Тиж, окончена и порада коло участвованя даєдного од наших КУД-ох на предстояцим Националним швету Руснацох Мадярскей 22. и 23. мая. Мож повесц же тота нащива була вецей як успишна, а намаганє же би нє була и єдина, та прето порадзене же би така файта сотруднїцтва була нє лєм предлужена, алє и преглїбена.
Миломир Шайтош
|