|
МЕТОДИЙ БУЛ РУСИН?
Нє обидзена и вична тема Русини або Українци. У часопису видрукована и розгварка (под назву Україна нє ма право на Подкарпатску Рус) Виталия Мещерякова зоз предсидательом Сойму подкарпатских Русинох о. Димитрийом Сидором, дзе ше, коло иншого може пречитац же найстарши документ о русинскей држави Русинска марка (Marcha Ruthenia) походзи зоз 10. столїтия. Тиж так мож дознац же вироучителє Кирило и Методий жили на русинскей жеми скоро цали рок. За тот час на тельо научели наш язик же их локални жителє наволовали Русинами. О тим писмене свидоцтво дава чески хронїчар Далимил. Вон пише "Методий бул Русин, вон служел першу службу божу по славянски и першого Чеха кресцел". Шицко то свидоцтво, же Методий ту под Карпатами нашол блїзки язик, котри познал уж од скорей и хасновал го у своєй мисиї. Можеме твердзиц, же при твореню матрици церковнославянского язика Кирило и Методий похасновали нє лєм язик солунских Славянох алє и елементи прарусинского язика …
|
У росийскей верзиї нємецкого тижньовнїка
Шпиґел бул у тогорочним фебруарским чишлє, и то у главней теми,
видруковани обсяжни материял о Русинох автора Михаила Черниґовцева.
Обсяжни материял вишол под насловом Русини, народ, котри нє видно
зоз Києва, дзе ше могло пречитац досц интересантни и хасновити
податки нє лєм зоз историї Русинох Подкарпатскей Руси, алє нє мало
простору автор пошвецел контактом Русинох зоз других жемох, преважно
зоз Росиї и ЗАД.
