РУСНАК ИНФО

Почитовани панї и панове, нащивителє сайту Рускей матки, члени и почитователє традициї, идейох, намаганьох и роботи Рускей матки

Зоз вельким задовольством можем виглашиц же после длугшого часу знова зажил сайт Рускей матки! Гоч ище нє було плановане же ше сайт "пущи" до роботи, збуваня хтори ше остатнїх дньох послучовали нам Руснацом, як ткв. "українскей дияспори", нагнали нас же би зме и таки, нє редизайновани сайт положели на "мрежу шицких мрежох".

У медзичаше, док сом роздумовал же як започац тот текст, читал сом по Интернету же цо и як думаю, роздумую, коментарую и реаґую припаднїки Руского народу хтори мали щесца лєбо шмелосц пойсц отадз, а о тим "сходу українскей дияспори" у Сербиї зволаним на инициятиву предсидателя єдиней держави на швеце хтора припаднїком нашого Народу нє припознава основни постулат демократиї, тє. же би ше вияшнєли так як сцу. Слова и термини хтори ше у (по моїм думаню) оправданих реаґованьох на Интернету хасную у оценьованю одходу "руских преднякох" на сход "українскей дияспори", нажаль, ту нє можем похасновац бо бим найвироятнєйше бул обвинєти же ширим (найблагше поведзено) порноґрафски словнїк.

Ми часто о дачим, даякей подїї, збуцу, збуваню и подобним, реаґуєме импулсивно, нє роздумуюци, нє роздумано, нє обдумано, гевто цо ше гвари: "на першу лабду". Тераз кед од тей подїї, хтору велї наволую "ганьба, реферованє и поклонениє Ющенкови, предаванє Руснацтва и Руснацох, зрада цалого Руского народу нє лєм ту у Войводини и Сербиї, алє вшадзи дзе Руснаци жию..." и подобне, а заш други (правда же их на пальци єдней руки мож начишлїц, алє...) гваря же то "историйне збуце хторе було нєобходне же би ше случело" (бо так ше, озда, помогнє нашим шестром и братом на Подкарпат'ю хторих, тота иста власц хторей Ющенко експонент, вишлїдзує, прислухує, грожи и гарештує), гварим, понеже од тей подїї прешол уж одредзени час, требало би буц, релативно, лєгко вианализовац ю и одгаднуц прецо до того стретнуца вообще и пришло, хто го насправди "видайкал" и кому воно принєсло хасну, а кому чкоди.

Алє, рушме шором. Як цо познате, початком юния мешаца у Руским Керестуре отримани ювилейни 10.-ти Шветови Конґрес Руснацох/Русинох/Лемкох. Гоч велї обчековали же придзе до реинтеґрациї Сойму Подкарпатских Русинох и Шветового Конґресу, як и до интеґрациї Шветового Конґресу Руснацох/Русинох/Лемкох и Шветового Конґресу Подкарпатских Русинох, нажаль, то ше нє случело. Заш лєм, старе зволанє Шветовей ради хтора на инициятиву прешлого предсидателя "вируцела" Сойм зоз составу Шветового Конґресу РРЛ пре, нїби, мишанє до политики (як же национална политика то нє), гоч на то нє мала право бо то потупйованє Статуту Конґреса, зменєне и формована нова Шветова рада у чиїм составе ше находза и особи хтори участвую и у роботи Шветового Конґресу Подкарпатских Русинох. То барз добре, бо то, за тераз лєм, вяза, карика помедзи два Конґреси, хтори ше пре исту тематику зоз хтору ше занїмаю (лєм же Шветови Конґрес Подкарпатских Русинох оштрейши, радикалнєйши у своїх вимогох и вимаганьох од "милей мацериней", як цо то Шветови Конґрес Руснацох/Русинох/Лемкох хтори ше остатнїх рокох уколїсал до успихох хторих евидентно мал) обовязно буду мушиц зєдинїц до єдного Конґресу шицких Руснацох Швета.

Резолуция хтора принєшена на 10.-тим Конґресу РРЛ нє по дзеки лєм гевтима хторима нїяк нє одвитує константни розвой Руснацтва/Русинства на Горнїци, односно на териториї матичного Народу. Алє, то анї нє розвой, алє врацанє на позициї хторе воно, Руснацтво/Русинство, мало скорей Другей шветовей войни. То лєм намаганє за врацанє шицких гевтих правох и шлєбодох цо их Руснаци/Русини мали у своєй автономней Подкарпатскей Руси хтора була у рамикох Чехословацкей Републики од 1919. та по 1938. рок, односно од заключеня Версайского миру и Триянонского спорозуменя, та по подполну окупацию Чехословацкей Републики. Ту треба повесц ище лєм тото же главни варош автономней Подкарпатскей Руси бул Ужгород, а же єй територия було и цале Подкарпат'є, хторе ше аж од 1946. року на силу, дзекуюци лєм Сталїнови и його одлуки диктатора, находзи у составе ССР України, гоч кельо мнє познате, Україна нїґда и нїяке спорозуменє о тим нє подписала зоз Чехословацку Републику. Руски/Русински народ Подкарпат'я од 1991. року нєдвозмислово виражує свойо ясне становиско у хторей и якей держави би любел жиц. Щиро ше наздавам же вон тото свойо жаданє и витвори.

А прецо дзепоєднима тот и таки розвой нє одвитує? Пре просту причину же кед ше Руснацтво/Русинство розвиє, односно враци одняти му права, тота малочислена ґрупация траци шицки свойо паразитски привилеґиї. Вежнїме лєм як приклад шкаредну, штучну "националносц" Руснаци-Українци, чи зоз, а чи без смужки, у тей хвильки то нє таке важне. Важне зрозумиц же ше зоз тоту франкенштайновску идею источасней припадносци двом розличним народом, сцу хасновац, найчастейше лєм пре свой власни, еґоистични хасен, ресурси (од материялних, та по финансийни) обидвох тих народох. Треба буц щири и припознац же припаднїки українского народу, и ту и у других державох, тото скорей од нас похопели и оправдано ше гнїваю на Руснацох, бо як єден з правдивих Українцох гварел: "цо ше ви Руснаци трепеце там дзе вам нє место!" А заш, єст и Руснацох бистрей глави, та єден написал (парафразуєм): "... кед бим даяким случайом бул Українєц, думам, гевтот прави-правучки, я би ше увредзел на Руснацох цо моєй националносци однїмаю припознаня, титули, рижни бенефициї, ордени, материялну помоц....". Та так, кед ше вианализує и отворено пове цо права намира и кед ше ю "розголї" и зоз того ракурсу патри на тото шицко, вец у подполносци постава ясне же прецо тельо "ґалами" на Резолуцию Конґресу хтора у сущносци лєм єдно природне заключенє же дзе Конґрес и Руснаци нєшка, а дзе би требал и требали буц наютре. И, нормалне же Резолуция нє може и нє треба же би бешедовала у мено шицких. Вона бешедує лєм у мено Руснацох. Хто ю и себе видзи, лєбо доживює иншак, то його право, лєбо його проблем. Кому як одвитує и пасує.

На яки способ спатриц, лєбо розумиц отримованє сходу СФУЛО у Руским Керестуре тидзень по законченю 10.-го Шветового Конґресу Руснацох/Русинох/Лемкох? (Гваря же би дзепоєдни були барз щешлїви кед би ше то волало СФУ'Р'ЛО. За огромне число гевтих хтори нє знаю (лєбо их вообще нє интересує) цо то значи, давам пояшнєнє: то Шветова Федерация Українских и Лемковских Орґанизацийох, а гевто 'р' намаганє же би ше уруцел и прикметнїк 'руских', лєбо 'русинских'. Ясне же то намаганє же би ше дал яки-таки "леґитимитет" нонсенсу же Руснаци/Русини "суб-етнос велького Українского народу".) У сущносци, пояшнєнє барз єдноставне: подрозумює ше же кед ше роби на знїчтоженю дачого процив чого сце (пре було яки причини, а найчастейше пре загрожени власни интерес, хасен), же вец будзеце патриц на вшелїяки можлїви способ ануловац, лєбо кед то пре вельки успих нє мож, вец голєм, кельо мож, зменшац тот успих супарнїка, лєбо свойого нє истодумнїка. Праве у тим контексту треба патриц и на спомнуте зашеданє СФУЛО. Кед би то нє було так як сом праве гварел, вец би ше (по даякей лоґики хторей ту нєт) тот сход отримал у, напр. Кули дзе єст Українцох, а нє у Керестуре.

И тераз ше врацаме на початне питанє же чом сход при Ющенкови? Ша праве пре шицко тото горе наведзене. Очивидно же друженє у керестурским интернату (СФУЛО) нє дало обчековани резултати, односно прешло подполно нє замерковане, за розлику од Шветового Конґресу РРЛ (прейґ 200 учаснїкох, ТВ екипи иножемних державних ТВ, даскельо домашнї ТВ, вельке число акредитованих новинарох зоз числених державох, итд., итд.). Дацо ше мушело поробиц, лєм питанє було же цо. Идеалне ришенє, хторе ше саме "намесцело" бул Самит у Новим Садзе. Нагода хтору ше нє шмело препущиц. Цо и як ше далєй послучовало, уж и тащки знаю. За Руснацох ганьба, а за "Руснацох" радосц. Верим же кажде за себе зна же хторим и яким Руснацом припада.

Мирослав Силадї у єдним своїм авторским тексту з нагоди сходу при Ющенкови гвари же бул шокирани кед на фотоґрафийох (останю на здогадованє, паметанє, ганьбу и наук) видзел хто шицко там бул. Я нє бул шокирани з тим хто там бул. Я би бул шокирани кед би тих и таких там нє було. Знам же ме велї буду осудзовац пре тоти мойо слова, алє, добре же тот сход отримани. Голєм знаме на чим зме. По правди поведзене, знали ми то и од скорей, алє тераз маме и аудио-визуелне потвердзенє.

А цо повесц о сеґменту емисиї "Добри вечар, Войводино" хтора емитована нєодлуга по сходу при Ющенкови (можебуц назва тей часци емисиї требала буц: "Ющенку у походе"), дзе госц (медзи иншима) у студию рускей редакциї и домашнього, пана Дюри Дудаша, бул и пан Славко Орос, предсидатель Националного совиту Рускей националней заєднїци (меншини), а хтори тиж бул на сходу хтори зволал Ющенко. З тей нагоди нє будзем анализовац водительску схопносц пана Дудаша (а же би ми дахто нє предруцел же одкадз ми право за таку файту анализи, повем лєм тельо же сом єден час бул заняти праве у РТВ Нови Сад дзе сом, медзи иншим, водзел и емисиї "на живо"). Гевто цо ме зацикавело у тей розгварки водителя и пана Ороса то було пояшнєнє же цо предсидатель Националного совиту Руснацох мал глєдац при шефови єдиней держави хтора Руснацох на своєй териториї нє припознава, а у других державох их припознава, алє лєм як свою, "найстаршу українску дияспору" т.є. як свой "суб-етнос". Мушим припознац же, нажаль, нє мам видео знїмок тей розгварки у студию, алє спрам гевтого цо и кельо сом запаметал, тота емисия виволала супротни ефект од гевтого цо ше з ню сцело и цо була намира автора и госцох у студию. Жалосне було патриц пробованє пренаходзеня оправданая за гевто цо зробене. По моїм думаню, нєт и нє може буц оправданя за одход "на ноги" ґу гевтому хтори це патри до оч и гвари ци же ти нє постоїш, а кед же, евентуално, и постоїш, вец то нє ти, алє хтошка ши инши и инше. Кед же правда тото цо ше приповеда медзи шветом же було "зивканя" и "моляканя" на мобилни же би ше вшелїяк и обовязно пошло "Ющенку у походе", вец каджа дальша приповедка илузорна, а кредибилет за репрезентованє Руснацох страцени.

Реално патрено, тот кредибилет за репрезентованє Руснацох давно страцени. Ище теди кед ше першираз пошло до українскей Амбасади. И то нє протестовац пре справованє "мацериней" спрам Руснацох на Подкарпат'ю, алє на преславу. Нияка нє вигварка же би ше пошло и до амбасадох других державох кед же би поволали. А прецо же би поволовали?! Дали шицки други держави своїм Руснацом/Русином/Лемком право вияшнїц ше як Руснаци/Русини/Лемки? Дали! Нацо вец исц до амбасадох тих державох? Окрем по визи же би зме ше могли стретнуц зоз нашима припознатима шестрами и братами, алє то уж друга приповедка.

А цо кед причина за "Ющенку у походе" праве тот страцени кредибилитет? Якей то ма вязи? Нє знам чи ма, алє би могло мац. Кед формовани Национални совит у терашнїм составе, були зме барз пишни бо вельку часц чишлєли члени Рускей матки (голєм ше теди так декларовали). Сами зме гуторели же зме добру роботу окончели бо "союзашох" нє було, цо ше гвари: анї. Добре, прецагнул ше даєден ту и там, алє Маткоше, так голєм випатрало, були доминантни. И шицко було ОК. По перше дзелєнє пенєжу. Кельо Матки, тельо и Союзу! А дал им дацо українски Национални совит? Нє. А прецо дал руски? Бо, гат, и вони нашо людзе. Е, ..... ци таке пояшнєнє! Як ту нєдавно єден гварел: "...финансуєш своїх нєприятельох"! То, випатра, лєм ми Руснаци таки мазохисти. Нїхто вецей. Як ше лєгко и швидко забува цо и яки коментари були праве од тих и таких "наших людзох" о составе Националного совиту, о його предсидательови, итд. Раз, другираз, трецираз, пенєжи, потим єдна амбасада, друга, треца, а "плюваня" и критики "наших людзох" прешли до вишпивйованя одох. Пояшнєнє? Як гвари Силадї: "ти то нє розумиш, то висока политика". Чи є висока, чи нє, нє знам, алє же "пахнє", "пахнє". А виберанки за нови Национални совит ше приблїжую...

Єст цошка цо ше вола комплекс. Тоти цо студирали психолоґию би о тим могли днями приповедац, алє можем и я голєм тельо кельо я учел психолоґию на факултетох. Постоя рижни файти комплексох: меншей вредносци, векшей вредносци, вароша над валалом, факултету над стредню школу, лєбшого над горшим автом, итд, итд. Кед би ше глїбше "задрапало" кажде з нас ма даяки комплекс и то ше у нєшкайши, сучасни час трима як нормалне. Значи, нє проблем чи маш комплекс, чи нє, алє чи ше можеш вибориц з нїм, чи нє. Кед нє можеш, вец правиш глупосци, идзеш з гришки до гришки, робиш погришни ствари, идзеш на погришни места, итд, итд. А кед правиш гришки хтори други видза, вец ше мушиш "виберац" з тих гришкох. И цо ше вецей "вибераш", а на погришни способ, вше глїбше препадаш, тонєш. И дзе виход? Виходу нєт, понеже то зачаровани круг. Нє, констатация нє точна, бо виходу єст. Звонимир Павлович то крашнє елаборовол на єднодньовей конференциї "Концептуализация фестивалох Руснацох" хтора тих дньох отримана у организациї Завода за културу войводянских Руснацох. Вон (З.Павлович) то єдноставно пояшнєл зоз словами: "...лєбо ши схопни и способни за тото цо робиш, лєбо ши нє. Кед ши нє, пущ схопнєйших и способнєйших од себе най вони робя тото цо ти нє можеш и нє знаш". Крадке и ясне, та чи ше дакому пачело, чи нє.

И после шицкого того цо сом по тераз гварел/написал у тим тексту, думам же сом у подполносци одвитовал на питанє же прецо до того стретнуца пришло, хто го "видайкал" и кому воно принєсло хасну, а кому чкоди.

Гварел сом, там дзешка на початку того тексту, же сом информациї нашол, дознал и "позберал" зоз Интернету. Прецо зоз Интернету? Прето бо ше єдино на "мрежи шицких мрежох" мож точно и правдиво информовац о тим цо ше, насправди случує коло, при, и у нашей националней заєднїци. Чом то так? Пре таки "руски" медиї, и їх "ушорйовацку политику" (хтора шицко друге окрем ушорйовацкей), яких нам ше надрилює з боку дзепоєдних лобийох, интересних ґрупох и поєдинцох хтори на тельо ароґантни и "полни себе", а у сущносци им уровень интелиґенциї еквивалентни числу їх ципелох, же нє роздумую же "нїчия нє горела до рана".

Абсурд же праве дзекуюци тим лобийом, интересним ґрупом и поєдинцом хтори на шицки можлїви способи пробую цензуровац и филтровац информациї, односно обявйовац лєм гевто цо їм по їх думаню хаснує, пришло до експанзиї, експлозиї информацийох. За вельо того би ше, можебуц, анї нє знало (а то уж друга тема же прецо ше "руски" медиї чия улога и длужносц обяавиц информациї першенствено интересантни за Руснацох, прецо ше тоти и таки медиї нє мишаю до власней роботи), кед би "руски" медиї то упарто, же то уж постало и "напарто" нє иґноровали. Медиї ше и далєй, з велькей часци, справую по "принципе" 90.-тих рокох: "...кед дацо нє обявене, вец то анї нє постої, т.є. анї ше нє збуло". Таке справованє погришне, бо ше вше враца як бумеранґ. А бумеранґ може буц барз опасни кед ше з нїм нє меркує.

И, нормално же велїма "джобе" очи же прецо ше цошка цо важне за векшину нє обявює, лєбо обяви зоз меншим, лєбо векшим запожнєньом, як цо, напр., информация же Национални совит уж два раз "олєгчани", окраднути, за вкупно цца. 20-25.000 еври. То, дзешка коло 2.100.000,00 динари, а спрам информациї зоз Министерства за людски и меншински права, Руснаци за цали 2008. рок достали вкупно 7.094.319,00 динари. Та так "випаднє", же дакус менєй як єдна трецина (цца. 29,61 %) вкупних пенєжох за шицких Руснацох скапало у молги. Людзе як людзе, та ше у такей ситуациї зяви и роздумованє же ту цошка "нє чисте". Бо як то може же би ше истей особи, лєбо дакому зоз єй найблїзшого окруженя, удало поробиц два раз исте за крадки час, а найодвичательнєйши о тим цихо, лєбо нє реаґовали и нє одреаґовали такой першираз так як требало. Пре таке справованє, саме од себе ше надрилює питанє же чи ше, можебуц ище дакому дацо од тей "мачанки", нє "ушло".

Я нє сцем уходзиц до того же чи ше дакому "ушло", а чи нє. Я оправдано поставим питанє же чи праве тоти, менєй-вецей, 20-25.000 еври (лєбо їх даєдна часц) нє хибя та тераз, за розлику од Словацох, Мадярох, Румунох, и кого ище нє, ми Руснаци нє можеме отримац свой Фестивал рускей култури "Червену ружу" теди кеди єй час и кеди ше єй швечи, а тиж и други фестивали, бо зме пенєжи хтори нам держава (на ложичочку) дала нє знали зачувац. Кед же то так, вец одвичательносц дзепоєдних ище векша, односно така є велька же ше вше у нашим Народзе буду споминац, а на яки способ, то нє чежко одгаднуц.