РУСНАК ИНФО

12.11.2009
http://www.ua-reporter.com/novosti/69382

Русини у Закарпатю, як и росияни у Криму, жадаю зачувац себе, свой язик, свою културу. Пре то ше нє пачиме помаранчецовей власци.

Протести нєвелького народа чую ше на териториї України вше гласнєйше, цо нє дава можлївосц Юшенкови и компаниї нарисовац за Заход малюнок нашого общого блаґостаня, єдинства и жаданя же би Україна ступела до НАТО.

Мали закарпатски народ нє сце до НАТО. Вон жада мирно жиц по Божих законох, як гутори лидер русинох священїк Димитрий Сидор. Власцом ше то нє пачи и пре то ше Сидор находзи у зони окремней уваги специялних службох безпечносци України (СБУ).

Тих дньох у Ужгородзе, у шедзиску закарпатскей обласней управи СБУ одбуло ше випитованє священїика Димитрия Сидора пре його вияви и ришеня сойма Подкарпатских русинох о созданю Закарпатскей русинскей автономиї.

Ориґиналносц того дїйства специялней служби у тим же ришели тото випитованє направиц доступним явносци и поволали даскельо новинарох зоз реґионалних информативних хижох.

Кед пришол до СБУ и видзел представительох преси, глава Сойма подкарпатских русинох Димитрий Сидор ше нєсподзивал, а по тим и збунєл, наволуюци тоту акцию СБУ политичним шоуом, орґанизованим процив його особнє. Вон обвинєл закарпатски информативни хижи же су нє обєктивни и же су анґажовани и же робя за рахунок специялних службох Америки. По тим представителє преси нє чули вецей анї слово од Сидора. Нїч нє сцел одвитовац анї на питаня вишлїдетоваля.

Ту нєобходне повесц же ше русински народ дошлїдно бори за свойо права. И Росияном би така дошлїдносц.

25, отобра 2008 року у Мукачове, под час отримованя II Европского конґреса подкарпатских русинох, глава Сойма подкарпатских русинох отец Домитрий Сидор, священїк Українскей Православней Церкви Московского Патриярхата, и ище даскельо стотки учаснїкох конґреса подписали меморандум о обнавяню державносци Подкарпатскей Руси у статусу од 22, новембра 1938 року – автономней републики у составе українскей терирориї.

Русини (руснаки, карпатороси)- стародавни жителє Карпатского реґиона. Вони ше декларую як окремни народ и официйно су припознати у 22 держави швета. По резултатох попису у України 2001. року у Закарпатскей обласци жиє 10069 русинох.

1992. и 2002. року Закарпатски обласни совит двараз вимагал од депутатох Верховней Ради припознац русинох як окремну националносц.

У авґусту 2006 року Комитет за ликвидацию расовей дискриминациї ОЗН поволал Україну припознац русинох як националну меншину. У марту 2007 року Закарпатски обласни совит припознал тоту етнїчну ґрупу на своєй териториї.

Официйни власци у Києве намагаю ше обвинїц русинох за сепаратизем. То ше фше так случує кед ше тота або друга национална меншина бори за свойо права. Коло того, як ше русинох може наволовац сепаратистами кед ше їх лидер вецей раз ясно вияшнєл за єдинство України?

- Нїґда на Закарпатю нє було сепаратизму. Його видумали ви, києвляни, олиґархи и шицки други преступнїки котри маю доступ до державней власци и маю можлївосц окрадац националну територию русинох- так у преси виявел протоєрей Димитрий Сидор.

- Ми 17 роки гуториме же сцеме войсц до составу України, алє на правох законского, конститутивного статуса а нє як раби и колония Ґаличини и України. Ми шлєбодни, суверени народ и то записане у медзинародних догваркох. Место того Служба Безпечносци України (СБУ) обвинює нас за потупйованє Устава- подцагнул о. Сидор.

Ми сцеме обновиц свою державносц, котра у согласю зоз референдумом (1991) а то специялна самоуправна територия. Ми ю градзиме, алє кед нас престаню репресировац, ми застановиме процес и будземе глєдац ровноправносц у составе України. Ми сцеме националну републику у котрей би були национални школи и други державни орґани же би витворели право бешедовац и шпивац по своїм, а нє слухац києвлянох и ґаличанох котри гваря – кед ши русин вец ши аґент, - виявел новинаром о. Димитрий Сидор.