РУСНАК ИНФО

БЕОҐРАД - ДЗЕШАТИ ШВЕТОВИ КОНҐРЕС РУСНАЦОХ

Министер Чиплич придзе на отверанє Конґреса

БЕОҐРАД, 1. юний 2009. (Рутенпрес) - Министер за людски и меншински права у Влади РС Светозар Чиплич потведзел свой приход до Руского Керестура, на шветочносц з нагоди отвераня Дзешатого шветового Конґреса Руснацох, Русинох, Лемкох, котри од 4. по 7. юний будзе отримани у Руским Керестуре.

Министер Светозар Чиплич тото потвердзел предсидательови Националного совиту Руснацох Славкови Оросови и предсидательови Рускей матки Дюрови Папуґови, котрих з нагоди наступного Конґреса приял пияток, 29. мая, у Министерстве у Беоґрадзе

И на тих остатнїх розгваркох з министром Чипличом, ище раз потвердзене же Дзешати Конґрес РРЛ у Сербиї будзе отримани под покровительством Министерства за людски и меншински права Влади РС и Вивершней ради АП Войводини, так же отвераню Конґреса найвироятнєйше буду присуствовац и други високи державнїки Сербиї и найвисши представнїки АП Войводини.

Папуґа и Орос подзековали министрови Чипличови на покровительстве, алє и на сполнєтих обовязкох його Министерства як покровителя Конґреса, понеже шицки финансийни и орґанизацийни обовязки з боку Министерства за людски и меншински права уж сполнєти пред початком Конґреса.

(конєц) зам

РУСКИ КЕРЕСТУР - ДЗЕШАТИ ШВЕТОВИ КОНҐРЕС РУСНАЦОХ

Приход делеґатох и госцох на штварток

РУСКИ КЕРЕСТУР, 2. юний 2009. (Рутенпрес) - Того тижня, на штварток, 4. юния, до Руского Керестура поприходза числени делеґати и госци на Дзешати шветови конґрес Руснацох, Русинох, Лемкох, котри ше у нашей жеми, односно у Руским Керестуре.

Попри Дзешатого Конґреса, у исти час будзе отримани и Штварти шветови Форум младежи Руснацох, Русинох, Лемкох.

Здогаднїме - Руски Керестур Шветовому Конґресу РРЛ, и то Трецому, бул домашнї пред штернац роками, 1995. року, кеди означована и 250-рочнїца од приселєня Руснацох на тоти простори.

Терашнї, ювилейни Дзешати шветови Конґрес будзе отримани од 4. по 7. юний, а єден Конґресни дзень, соботу 6. юния, будзе отримани и у Петровцох, у Републики Горватскей.

Главни орґанизатор и домашнї Конґресу Руснацох у Сербиї то Руска матка, з помоцу других наших орґанизацийох, а главни покровителє отримованя Шветового Конґресу РРЛ Министерство за людски и меншински права Влади Републики Сербиї и Вивершна рада Скупштини АП Войводини.

На Конґрес до Руского Керестура и Петровцох приходза коло 200 делеґати и госци -представителє вецей русинских орґанизацийох и асоцияцийох котри творя Конґрес, и то зоз Польскей, Ческей, Словацкей, Мадярскей, Румуниї, з Подкарпатя у України, та заєднїцвка делеґация зоз Америки и Канади.

Урядова робота Конґреса и його Комисийох започина на пияток, 5. юния дополадня, зоз Шветочним отвераньом Конґреса и першим пленарним зашеданьом у Велькей сали Дома култури.

Истого дня пополадню, у просторийох керестурскей Школи "Петро Кузмяк", будзе отримана робота по Комисийох Конґреса - за културу, просвиту, литературу, духовну овласц и за економию.

На соботу, 6. юния, друга пленарна схадзка Конґреса будзе отримани у Петровцох, у Горватскей, а робота Конґреса будзе закончена на нєдзелю, 7. юния дополадня, зоз трецим пленарним зашедньом.

(конєц) зам

РУСКИ КЕРЕСТУР - ДЗЕШАТИ ШВЕТОВИ КОНҐРЕС

Богата провадзаца програма

РУСКИ КЕРЕСТУР, 2. юний 2009. (Рутенпрес) - Под час отримованя Дзешатого шветового Конґреса Руснацох, Русинох, Лемкох, орґанизаторе у Руским Керестуре пририхтали и богату културно-уметнїцку програму.

Так на штварток, 4. юния у вечарших годзинох плановане отверанє вистави малюнкох-портретох найвизначнєйших Руснацох швета, медзи нїма и портрет др Гавриїла Костельника. Истого дня плановане отверанє вистави малюнкох 17 руских авторох з нашей жеми.

На штварток вечар, 4. юния, после театралней представи "Мудрило" у виводзеню нашого професийного РНТ "Петро Ризнич Дядя" у Хорскей сали Дома култури будзе отримане стретнуце старших и младих поетох РРЛ зоз жемох членїцох Конґреса.

Пияток, 5. юния пополадню, у керестурскей Школи будзе отримана промоция илустрованей историї Карпатских Русинох “Народ нїодкадз”, кнїжки Павла Роберта Маґочия, котра з нагоди Конґреса обявена и по руски.

На истим месце будзе отворена и вистава кнїжкох и рижних других виданьох на руским, русинским и лемковским язику.

Истого дня, 5. юния вечар, у Велькей сали Дома култури будзе уручованє Награди за литературу "Александер Духнович", а после того шветочного чину, музично-танєчни ансамбл керестурского Дома култури отрима цаловечарши концерт.

Попри пленарней схадзки делеґатох и госцох Конґреса, и у Петровцох, у Горватскей, на соботу, 6. юния, запланована провадзаца културно-уметнїцка програма.

(конєц) зам

РУСКИ КЕРЕСТУР - ДЗЕШАТИ ШВЕТОВИ КОНҐРЕС РУСНАЦОХ

Ютре початок Конґреса

РУСКИ КЕРЕСТУР, 3. юний 2009. (Рутенпрес) - На ютре, штварток, 4. юния, у Руским Керестуре почина Дзешати шветови конґрес Руснацох, Русинох, Лемкох, котри ше того року по другираз орґанизує у нашей жеми, односно у Руским Керестуре.

Попри Дзешатого Конґреса, у исти час будзе отримани и Штварти шветови Форум младежи Руснацох, Русинох, Лемкох.

Ювилейни Дзешати шветови Конґрес будзе отримани од 4. по 7. юний, а єден Конґресни дзень, соботу 6. юния, будзе отримани и у Петровцох, у Републики Горватскей.

Главни орґанизатор и домашнї Конґресу Руснацох у Сербиї то Руска матка, з помоцу других наших орґанизацийох, а главни покровителє отримованя Шветового Конґресу РРЛ Министерство за людски и меншински права Влади Републики Сербиї и Вивершна рада Скупштини АП Войводини.

На Конґрес до Руского Керестура и Петровцох ютре приходза коло 200 делеґати и госци -представителє вецей русинских орґанизацийох и асоцияцийох котри творя Конґрес, и то зоз Польскей, Ческей, Словацкей, Мадярскей, Румуниї, з Подкарпатя у України, та заєднїцвка делеґация зоз Америки и Канади.

Урядова робота Конґреса и його Комисийох започина на пияток, 5. юния дополадня, зоз Шветочним отвераньом Конґреса и першим пленарним зашеданьом у Велькей сали Дома култури.

Истого дня пополадню, у просторийох керестурскей Школи "Петро Кузмяк", будзе отримана робота по Комисийох Конґреса - за културу, просвиту, литературу, духовну овласц и за економию.

На соботу, 6. юния, друга пленарна схадзка Конґреса будзе отримани у Петровцох, у Горватскей, а робота Конґреса будзе закончена на нєдзелю, 7. юния дополадня, зоз трецим пленарним зашедньом.

(конєц) зам

ПЕТРОВЦИ - ДЗЕШАТИ ШВЕТОВИ КОНҐРЕС

Програма Конґреса у Горватскей

ПЕТРОВЦИ, 3. юний 2009. (Рутенпрес) - Як познате, єден Конґресни дзень наступного Шветового Конґреса РРЛ, котри ютре почина у Руским Керестуре, будзе отримани и у Републики Горватскей, у Петровцох.

Шветови Конґрес РРЛ у Петровцох будзе отримани на соботу, 6. юния, а главни орґанизатор того збуваня тамтейше Здруженє "Руснак".

Отримованє єдного Конґресного дня у Петровцох ше отрима под покровительством Вуковарско-сримскей жупаниї, а у соорґанизациї з ОШ "Антун Бауер" у Петровцох.

Тиж так, отримованє Шветового Конґреса РРЛ потримую и Совит за национални меншини Републики Горватскей, Министерство култури РГ, як и Општини Боґдановци и Стари Янковци.

У Петровцох од 11 до 14 годзин будзе отримане друге пленарне зашеданє Конґреса у Доме култури, а од 15 годзин, на истим месце будзе отримана и промоция кнїжки Павла Роберта Маґочия "Народ нїодкадз", по горватски.

Спрам програми Конґресного дня у Петровцох, за делеґатох и госцох Конґреса од 16 годзин школяре настави пестованя руского язика и култури, зоз Петровцох и Миклошевцох, виведу пригодну културну програму.

Од 17. годзин, запланована нащива грекокатолїцкей церкви "Покрова Богородици" у Петровцох, а од 17,30 г., у петровскей Подручней школи будзе отримане Медзинародне стретнуце учительох руского/русинского/лемковского язика, поетох котри присуствую Конґресу, а госци нащивя и Етноґрафску збирку у Петровцох.

На вечар, од 19,30 г., КУД "Яким Ґовля" з Миклошевцох, Городске КМД "Дунай" з Вуковару и члени Дружтва "Руснак" виведу ширшу културно-уметнїцку програму, а Конґресни дзень у Петровцох будзе закончени з вечеру и друженьом домашнїх и госцох у сали "Соколана".

(конєц) зам

РУСКИ КЕРЕСТУР - ДЗЕШАТИ ШВЕТОВИ КОНҐРЕС

Ютрейша провадзаца програма

РУСКИ КЕРЕСТУР, 3. юний 2009. (Рутенпрес) - Под час отримованя Дзешатого шветового Конґреса Руснацох, Русинох, Лемкох, од 4. по 7. юний у Руским Керестуре, орґанизаторе пририхтали и богату провадзацу културно-уметнїцку програму.

Културно-уметнїцка програма под час Конґреса започнє уж на ютре, штварток, 4. юния, кед на 18,30 г. у Школи "Петро Кузмяк" будзе отворена вистава малюнкох-портретох найвизначнєйших Руснацох/Русинох швета, медзи нїма и портрет др Гавриїла Костельника.

После того, ютре од 19 г., алє у керестурским Доме култури, заплановане отверанє и Вистави малюнкох 17 руских авторох, подобових уметнїкох з нашей жеми.

На штварток, 4. юния вечар, од 19,30 г., наш професийни РНТ "Петро Ризнич Дядя", у Велькей сали Дома култури, виведзе театралну представу "Мудрило" Михеон Хун Кана, у режиї Янка Лендєра.

Ютрейша провадзаца програма Конґреса будзе закончена зоз стретнуцом старших и младих поетох РРЛ зоз жемох членїцох Конґреса, котре од 21,30 г. будзе отримане у Хорскей сали керестурского Дома култури.

(конєц) зам

РУСКИ КЕРЕСТУР - ДЗЕШАТИ ШВЕТОВИ КОНҐРЕС РУСНАЦОХ

Нєшка сцигую делеґати и госци Конґреса

РУСКИ КЕРЕСТУР, 4. юний 2009. (Рутенпрес) - Нєшка, штварток, 4. юния, до Руского Керестуре поприходза коло 200 делеґати и госци - члени русинских орґанизацийох и асоцияцийох котри творя Шветови Конґрес Руснацох, Русинох, Лемкох и Шветови Форум младежи Руснацох, Русинох, Лемкох.

У Руским Керестуре, и єден дзень у Петровцох, у Горватскей, од 4. по 7. юний будзе отримани Дзешати шветови Конґрес РРЛ и Штварти шветови Форум младих РРЛ.

Нєшка у пополадньових годзинох, на Дзешати Конґрес до Руского Керестура и Петровцох, як и на Штварти Форум младих, приходза представителє руиснких орґанизацийох зоз Польскей, Ческей, Словацкей, Мадярскей, Румуниї, з Подкарпатя у України, та заєднїцка делеґация з Америки и Канади.

Главни орґанизатор и домашнї Конґресу Руснацох у Сербиї то Руска матка, з помоцу других наших орґанизацийох, а главни покровителє отримованя Шветового Конґресу РРЛ Министерство за людски и меншински права Влади Републики Сербиї и Вивершна рада Скупштини АП Войводини.

Нєшка, 4. юния пред вечаром и вечар, заплановани вецей културно-уметнїцки програмни змисти у рамикох Конґреса, а урядова робота Конґреса и Форума младих започина на пияток, 5. юния дополадня, зоз Шветочним отвераньом Конґреса и першим пленарним зашеданьом у Велькей сали Дома култури.

Як ше очекує, Шветочному отвераню Конґреса и Форума буду присуствовац и високи представнїки державних у покраїнских орґанох, а по першираз, на Шветовим Конґресу РРЛ, як госци, буду участвовац и посланїки/депутати Руснаци, у державних парламентох у жемох у котрих жиєме.

Ютре пополадню, у просторийох керестурскей Школи "Петро Кузмяк", будзе отримана робота по Комисийох Конґреса - за културу, просвиту, литературу, духовну овласц и за економию.

На соботу, 6. юния, друга пленарна схадзка Конґреса будзе отримани у Петровцох, у Горватскей, а робота Конґреса будзе закончена на нєдзелю, 7. юния дополадня, зоз трецим пленарним зашедньом.

(конєц) зам

РУСКИ КЕРЕСТУР - ДЗЕШАТИ ШВЕТОВИ КОНҐРЕС РУСНАЦОХ

Делеґати и госци спред Рускей матки

РУСКИ КЕРЕСТУР, 4. юний 2009. (Рутенпрес) - Делеґати Рускей матки Сербиї на Дзешатим Шветовим Конґресу РРЛ буду Дюра Папуґа, Ксения Медєши, Миломир Шайтош, Владимир Дудаш, Мирослав Силадї, о. Михаил Холошняй, Славица Бесерминї, Владимир Бучко, Владимир Малацко и Владимир Гаргаї.

Попри двоїх народних посланїкох у Народней Скупштини Републики Сербиї, госци Конґреса спред Рускей матки буду Славко Орос, Владимир Паланчанин, Гелена Медєши, Ирина Папуґа и Владимир Сабо Дайко.

На Стретнуцу поетох, котре нєшка, 4. юния будзе отримане у Хорскей сали Дома култури, зоз Сербиї участвую Ирина Гарди Ковачевич, Агнета Папгаргаї, Славко Винаї и Иван Медєши - шицки добитнїки мнедзинародней Литературней награди "Александер Духнович", як и Ася Папуґа.

Предшедуюци роботи Конґресних комисийох буду - за културу Миломир Шайтош, за просвиту Ксения Медєши, за духовну обласц о. Михаил Холошняй, за литературу и видавательну дїялносц Владимир Дудаш и за економию Мирослав Силадї.

(конєц) зам

РУСКИ КЕРЕСТУР - ШВАРТИ ШВЕТОВИ ФОРУМ МЛАДИХ РРЛ

У Керестуре, Коцуре и Новим Садзе

РУСКИ КЕРЕСТУР, 4. юний 2009. (Рутенпрес) - Вєдно з отримованьом Дзешатого Шветового Конґреса РРЛ, од 4. по 7. юний будзе отримани и Штварти Шветови Форум младих Руснацох, Русинох, Лемкох.

У роботи Форума младих РРЛ участвую по пецеро делеґати зоз жемох членїцох Конґреса, а спред Форума младих Рускей матки, делеґати буду Татяна Силадї, котра источасно будзе и предшедуюца Штвартого Форума, та Будимир Сабо Дайко, Биляна Дудаш, Дарко Абрахамски и Микола Медєши.

Урядове зашеданє Форума младих РРЛ почина на ютре, пияток 5. юния, и будзе отримане у просторийох керестурскей Ґимназиї, а нєшка, 4. юния, на вечар будзе отримане стретнуце младих поетох у Доме култури.

На соботу, 6. юния, учашнїки Штвартого Форума младих одходза до Коцура и Нового Саду.

У Коцуре, млади дополадня нащивя етно-збирку, грекокатолїцку церкву, Основну школу и Дом култури.

Пополадню, после обиходзеня центру Нового Саду, представительох Штвартого Форума младих РРЛ у Вивершней ради Войводини приме єй подпредсидателька Ана Томанова Маканова.

У Новим Садзе запланована и нащива Петроварадинскей твердинї, Катедри за русинистику на Филозофским факултету, а нащива Новому Саду будзе закончена у просторийох РКПД зоз друженьом и промоцию ЦД-а "Електроника Рутеника".

(конєц) зам

РУСКИ КЕРЕСТУР - ДЗЕШАТИ ШВЕТОВИ КОНҐРЕС

Ютрейша програма

РУСКИ КЕРЕСТУР, 4. юний 2009. (Рутенпрес) - У рамикох отримованя Дзешатого швеового Конґреса РРЛ, на ютре, пияток 5. юния, у просторийох керестурскей Школи, од 15 годзин будзе отримана промоция Илустрованей историї карпатских Русинох "Народ нїодкадз" Павла Роберта Маґочия, котра тих дньох обявена и по руски.

После промоциї, у Школи будзе отворена и вистава кнїжкох и виданьох на руским, русинским и лемковским язику.

Ютре вечар, 5. юния, од 19,30 г. у Велькей сали Дома култури будзе шветочне уручованє Награди за литературу Александра Духновича, а потим и концерт музично-танєчного ансамбла керестурского Дома култури.

(конєц) зам

РУСКИ КЕРЕСТУР - ДЗЕШАТИ ШВЕТОВИ КОНҐРЕС

Нєпкайша провадзаца програма

РУСКИ КЕРЕСТУР, 4. юний 2009. (Рутенпрес) - Уж нєшка, 4. юния, започнє провадзаца програма у рамикох Дзешатого шветового Конґреса РРЛ, котри ше од 4. по 7. юний отримує у Руским Керестуре.

Нєшка, на 18,30 г., у Школи "Петро Кузмяк" будзе отворена вистава малюнкох-портретох найвизначнєйших Руснацох/Русинох/Лемкох швета, медзи нїма и портрет др Гавриїла Костельника.

После того, од 19 г., алє у керестурским Доме култури, заплановане отверанє и Вистави малюнкох 17 руских авторох, подобових уметнїкох з нашей жеми.

Нєшка вечар, наш професийни РНТ "Петро Ризнич Дядя", у Велькей сали Дома култури, од 19,30 г. виведзе театралну представу "Мудрило" Михеон Хун Кана, у режиї Янка Лендєра.

Нєшкайша, штварткова провадзаца програма Конґреса будзе закончена зоз стретнуцом старших и младих поетох РРЛ зоз жемох членїцох Конґреса, котре од 21,30 г. будзе отримане у Хорскей сали керестурского Дома култури.

(конєц) зам

РУСКИ КЕРЕСТУР - ДЗЕШАТИ ШВЕТОВИ КОНҐРЕС РУСНАЦОХ

Нєшка перша пленарна схадзка

РУСКИ КЕРЕСТУР, 5. юний 2009. (Рутенпрес) - Зоз першу пленарну схадзку, нєшка, 5. юния од 10 годзин у Велькей сали Дома култури, почина урядове зашеданє Дзешатого Шетовового Конґреса Руснацох, Русинох, Лемкох, котри ше того року отримує у нашей жеми, односно у Руским Керестуре.

Попри Дзешатого Конґреса, од 4. по 7. юний, у исти час будзе отримани и Штварти шветови Форум младих Руснацох, Русинох, Лемкох, чийо зашеданє тиж почина нєшка, 5. юния - пополадню од 16 годзин, у просторийох керестурскей ОШиҐ "Петро Кузмяк".

Єден Конґресни дзень, на ютре, 6. юния, будзе отримани и у Петровцох, у Републики Горватскей.

Главни орґанизатор и домашнї Конґресу Руснацох у Сербиї то Руска матка, з помоцу других наших орґанизацийох, а главни покровителє отримованя Шветового Конґресу РРЛ Министерство за людски и меншински права Влади Републики Сербиї и Вивершна рада Скупштини АП Войводини.

Попри делеґатох, госцох Конґреса, членох Шветовей ради РРЛ, та членох Форума младих, нєшкайшому Шветочному отвераню Конґреса буду присуствовац и високи представителє державних орґанох Републики Сербиї и Покраїнских, зоз Скупштини и Вивершней ради АП Войводини.

У роботи Конґреса и Форума младих у Руским Керестуре и Петровцох участвую 200 делеґати и госци - представителє вецей русинских орґанизацийох и асоцияцийох котри творя Конґрес, и то з Польскей, Ческей, Словацкей, Мадярскей, Румуниї, з Подкарпатя у України, та заєднїцка делеґация з Америки и Канади.

После пленарного, нєшкайша робота Конґреса будзе предлужена пополадню, од 16 г., у просторийох керестурскей Школи "Петро Кузмяк", зоз зашеданьом комисийох Конґреса - за културу, просвиту, литературу, духовну обласц и за економию.

На ютре, 6. юния, друга пленарна схадзка Конґреса будзе отримани у Петровцох, у Горватскей, а робота Конґреса будзе закончена на нєдзелю, 7. юния дополадня, зоз трецим пленарним зашедньом.

Под час Конґреса ше отримує и културно-уметнїцку програму , котра уж започала вчера, 4. юния.

(конєц) зам

РУСКИ КЕРЕСТУР - ДЗЕШАТИ ШВЕТОВИ КОНҐРЕС

Вчерайша провадзаца програма

РУСКИ КЕРЕСТУР, 5. юний 2009. (Рутенпрес) - Зоз вчерайшим отвераньом двох виставох и єдну театралну представу, започала и богата провадзаца програма Дзешатого шветового Конґреса Руснацох, Русинох, Лемкох, котри ше од 4. по 7. юний у Руским Керестуре.

Вчера, 4. юния, у голу Школи "Петро Кузмяк" отворена вистава маляра Василя Скандия зоз України котри у рамикох проєкта 100 найвизначнєйших Руснацох/Русинох/Лемкох швета, по тераз намальовал 24 портрети, медзи нїма и портрет др Гавриїла Костельника. Виставу отворел Валерий Падяк видаветль зоз Ужгороду, автор того проєкта, а инциятор бул др проф Павле Роберт Маґочи.

Вчера вечар и голу керестурского Дома култури отворена Вистави малюнкох 17 руских авторох зоз Сербиї под назву "Пререз подобовей творчосци при Руснацох". Виставу прирхтал и отворел Владо Няради.

У рамикох Конґресних збуваньох, вчера вечар, 4. юния, наш професийни РНТ "Петро Ризнич Дядя", у Велькей сали Дома култури, одбавел театралну представу "Мудрило" Михеон Хун Кана, у режиї Янка Лендєра.

Вчерайша провадзаца програма Конґреса закончена зоз стретнуцом старших и младих поетох РРЛ, зоз жемох членїцох Конґреса, котре вечар отримане у Хорскей сали керестурского Дома култури.

(конєц) зам

ПЕТРОВЦИ - ДЗЕШАТИ ШВЕТОВИ КОНҐРЕС

Ютре Конґрес у Горватскей

ПЕТРОВЦИ, 5. юний 2009. (Рутенпрес) - Ютре, 6. юния, робота Дзешатого Шветового Конґрес РРЛ будзе предлужена у Републики Горватскей, у Петровцох.

Главни орґанизатор конґресного дня у Петровцох тамтейше Здруженє "Руснак", а отримує ше под покровительством Вуковарско-сримскей жупаниї, а у соорґанизациї з ОШ "Антун Бауер" у Петровцох.

Отримованє Шветового Конґреса РРЛ у Петровцох потримал и Совит за национални меншини Републики Горватскей, Министерство култури РГ, як и Општини Боґдановци и Стари Янковци.

Ютре, 6. юния, у Петровцох од 11 до 14 годзин будзе отримане друге пленарне зашеданє Конґреса у Доме култури, а од 15 годзин, на истим месце будзе отримана и промоция кнїжки Павла Роберта Маґочия "Народ нїодкадз", по горватски.

Спрам програми, за делеґатох и госцох Конґреса, школяре настави пестованя руского язика и култури зоз Петровцох и Миклошевцох, виведу пригодну културну програму.

Под час Конґресного дня у Горватскей, планована нащива грекокатолїцкей церкви "Покрова Богородици" у Петровцох, а у петровскей Подручней школи будзе отримане Медзинародне стретнуце учительох руского/русинского/лемковского язика, та поетох котри присуствую Конґресу, а госци нащивя и Етноґрафску збирку у Петровцох.

На вечар, КУД "Яким Ґовля" з Миклошевцох, Городске КМД "Дунай" з Вуковару и члени Дружтва "Руснак" виведу културно-уметнїцку програму.

Ютрейши Конґресни дзень у Петровцох будзе закончени з друженьом домашнїх и госцох, а робота Конґреса будзе предлужена у Руским Керестуре зоз трецу пленарну схадзку, на нєдзелю, 7. юния дополадня.

(конєц) зам

КОЦУР - ВИСТАВА

У Коцуре будзе вистава старих фотоґрафийох зоз прешлосци Руснацох

КОЦУР, 5. юний 2009. (Рутенпрес) - З нагоди нащиви делеґатох и госцох 4. Шветового форума младих Русинох/Руснацох/Лемкох Коцуру, у Основней школи "Братство-єдинство" на соботу 6. юния на 10,30 годзин будзе отворена вистава старих фотоґрафийох зоз прешлосци Руснацох.

Фотоґрафиї хтори дотикаю живот Рустнацох по штредок 20. вику буду обєдинєни до єдней цалосци и публиковани и як окремни каталоґ и як состойна часц трецого тома Русини/Руснаци/Рутхенианс (1745-2005).

Контакт за уручованє фотоґрафийох проф. Снежана Шанта (728-155), проф. др Михайло Фейса (727-590), а фотоґрафиї ше по скенираню враци власнїком. Фотоґрафиї мож и у електронскей форми послац на е-адресу: фифидреюЖгмаил.цом.

(Конєц)там

РУСКИ КЕРЕСТУР - ДЗЕШАТИ ШВЕТОВИ КОНҐРЕС РУСНАЦОХ

Нєшка уручованє Награди и концерт Дома култури

РУСКИ КЕРЕСТУР, 5. юний 2009. (Рутенпрес) - Найвисше припознанє за литетратуру шветового Конґреса РРЛ - Награда Александра Духновича, котру финансує Фондация Штефана Чепи з Торонта, будзе уручена нєшка вечар, 5. юния.

За Награду Александра Духновича конкуровали писателє и поетове зоз своїма творами по руски, русински и лемковски, а приявени роботи оценьовала за тото окремна комисия.

Награда Александра Духновича будзе уручена у рамикох провадзацих Конґресних збуваньох, нєшка вечар од 19,30 г., на бини керестурского Дома култури.

После шветочного преглашованя добитнїка и уручованя Награди Александра Духновича, нєшка вечар музично-танєчни ансамбл керестурского Дома култури, за учашнїкох Конґреса и Форума младих РРЛ, як и за шицку заинтересовану публику, отрима свой цаловечарши концерт у Велькей сали Дома култури.

(конєц) зам

РУСКИ КЕРЕСТУР-ДЗЕШАТИ КОНГРЕС

Вчера почала роботна часц дзешатого Конгреса РРЛ

РУСКИ КЕРЕСТУР,5. юний 2009. (Рутенпрес)- Вчера на 10 годзин у Руским Керстуре зоз пленарну схадзку почал зоз роботу Дзешати конгрес РРЛ у чиїм зашеданю робели коло 200 делегати и госци зоз жемох дзе жию Руснаци.

-Тото цо єдна з лєпших стварох у Сербиї, то же вона мултикултурална и мултинационална. По медзинационалних одношеньох, вона бренд яки шицки жадаю, и у векшей або меншей мири то жадаю копирац. Видзел сом кнїжку др Павла Роберта Маґочия "Народ нїодкадз" и сцем повесц же ви Руснаци народ од вшадзи, европски народ, а за Сербию окреме значне, и з чим ше пиши, же сце народ и зоз тей жеми, гварел у своєй привитней бешеди министер за людски и меншински права Влади Републики Сербиї, Светозар Чиплич.

Чесц отвориц Дзешати Конгрес РРЛ мал предсидатель Вивершней ради АП Войводини др Боян Пайтич. Вон з тей нагоди гварел:

- Руска зєднїца єдна з найстарших у Войводини и нє случайно же руски язик єден з урядових у АП Войводини.Горди зме на тото же Руснаци виками допринша розвою нашей заєднїци. Як мултикултурални штредок, Войводина ма вибудовани велї институциї котри чуваю и пестую идентитет националних заєднїцох котру у нєй жию.

Др Боян Пайтич пожадал Конгресу успишну роботу, и на концу своєй бешеди визначел же то "же ше ювилейни, Дзешти Конгрес отримує у Войводин комплимент тому цо Вивершна рада и цала заєднЇца робя за остатнїх рокох же би ше зачувало тото цо Войводина вше була ,єдинствена европска регия".

Пленарне зашеданє Дзешатого Конгреса водзело Роботне предсидательство, односно члени Шветовей ради РРЛ зоз жемох членїцох Конгреса а предшедавал секретар того цела Александер Зозуляк зоз Прешова.

Делеґати Конгреса такой на почтаку своєй роботи принєсли заключенє же би ше приступело пременком Статуту Шветового конгресу РРЛ чий предклад направи нове зволанє Шветовей ради котра на нєдзелю 7 юния будзе виберана у Руским Керестуре. Нови статут би требал буц прилапени на 11. Конгресу.

У цеку вчерайшого пленарного зашеданя поднєшени и уводни викладаня представительох-водзацих делегацийох зоз жемох котри творя организацию Конгреса о їх роботи и активносцох у медзиконгресним чаше.

Викладаня поднєсли Наталия Гнатко, Марияна Лявинец, Андрей Копча, о.Василь Бойчук, Дюра Папуґа, Владимир Противняк и Микола Бобинац.

Бешедуюци о медзиконгресних активносцох предсидатель Шветовей ради РРЛ, др Павел Роберт Маґочи визначел дазкельо обласци у котрих Конгрес односно його орґанизациї зазначели найвекши успихи. По його словох то обласц науки, образованя и видавательства. Вон визначел и живу дипломатску и медзинародну активносц у котрей Шветови конгрес РРЛ препознати як легитимни орган Карпатских Русинох.

Кед слово о проблемох др Маґочи наглашел же вони организацийного алє и структуралного характеру.Проблеми ше зявйовали у функционованю Шветовей ради и способе приношеня одлукох, по радикализовани наступи Сойма Подкарпатских Русинох 2008. року.

Кед у питаню програма роботи за находзаци период др Маґочи визначел же приоритет будзе наиходзаци попис жительства у 2011. року кед ше очекує же ше число вияшнєних як Руснаци, Русини и Лемки звекша у державох дзе жию окреме у Укрїни, Польскей и Румуниї.

(конєц) екипа Рутенпреса

РУСКИ КЕРЕСГУР-КОНГРЕС

Олена Дуц-Файфер лауреатка награди Александар Духнович

РУСКИ КЕРЕСТУР, 6. юний 2009. (Рутенпрес) – Олена Дуц-Файфер поетеса лемкиня зоз Польскей, тогорочна лауреатка литературней награди "Александар Духнович", котра єй шветочно уручена вчера вечар пред Концертом керестурского Дома култури.

Олена Дуц-Файфер награду достала за поетску збирку под меном "З обидвох бокох слова", а уручел єй ю проф. др Павло Роберт Магочи, предсидатель Шветовей ради РРЛ.

Традицийну награду за литературу "Александар Духнович" обезпечує Фондация Штефана Чепи зоз Канади.

(конєц) маф

РУСКИ КЕРЕСТУР - ШТВАРТИ ШВЕТОВИ ФОРУМ МЛАДИХ

Мартин Караш зоз Словацкей нови предсидатель Шветовей ради младих РРЛ

РУСКИ КЕРЕСТУР, 6. юний 2009. рок (Рутенпрес) - Зоз вибором нового руководства и утвердзованьом стратеґиї роботи вчера у Руским Керестуре закончени Штварти шветови форум младих Руснацох/Русинох/Лемкох.

За нового предсидателя Шветовей ради младих РРЛ вибрани Мартин Караш зоз Словацкей, за подпредсидателя Василь Пукиш зоз України, а попри нїх за членох Шветовей ради младих РРЛ вибрани Юлийо Фрицко зоз Румуниї, Мирослав Сеґеди зоз Горватскей, Андрей Трохановски зоз Польскей, Мария Силвестри зоз заєднїцкей орґанизациї Сиверней Америки и Будимир Сабо Дайко зоз нашей жеми.

Роботу Штвартого шветового форума младих отворела и привитала присутних делеґатох Татяна Силадї и поволала их же би винєсли звити о роботи шицких младежских орґанизацийох, членох Шветового форума младих, як и же би дали предлоги вязани за утвердзованє заєднїюкей стратеґиї роботи.

Утвердзуюци стратеґию роботи Шветового форума младих, увага дата на злєпшанє комуникованя шицких орґанизацийох младих - членох Шветового форума та догварене же будзе направени заєднїцки сайт и вичераю ше шицки имейл адреси.

Од приоритетних задаткох и утвердзованє, односно вименка Статута Шветового форума младих РРЛ и його друкованє на английским и русинским язику.

Догварене же би ше Камп Шветового форума младих убудуце отримовало каждого року та нарок будзе отримани у України, а 2011. у Сербиї.

Делеґати Штвартого шветового форума младих РРЛ вимагаю од Шветовей ради РРЛ же би превжала нєобходни мири и одлучно ше заложела за припознаванє Русинох у України, понеже, як гварене вони нє признати ище лєм у тей жеми.

Делеґати Штвартого шветового форума младих на самим початку роботи до Шветового форума прияли єдну нову орґанизацию младих "Млади Русини" зоз Словацкей.

Дзекузци на виборе за предсидателя Мартин Караш гварел же ше будзе намагац же би нови Статут достал кажди член Шветовей ради младих РРЛ и инсистовац на запровадзованю шицких стратеґийних задаткох хтори утвердзени на тим сходзе.

Робота була озбильна. Поставели зме себе ясни цилї и задатки и наздавам ше же за розлику од предходней, Шветова рада будзе добре робиц. Щиро зме ше догварели о шицким и думам же млади вельо орґанизованши як на предходних форумох и наздавам ше же по наступни Форум активносц и робота младих будзе на висшим уровню - гварел Сабо Дайко.

(конєц) мик

РУСКИ КЕРЕСТУР - ШВАРТИ ШВЕТОВИ ФОРУМ МЛАДИХ РРЛ

Делегатох шветового форума малдих приме Ана Томанова Маканова

РУСКИ КЕРЕСТУР, 6. юний 2009. (Рутенпрес) – Нешка делегати и госци Штвартого Шветового Форума младих Руснацох, Русинох, Лемкох буду у Коцуре, Вербаше и Новим Саду.

После обиходзеня центру Нового Саду, представительох Штвартого Форума младих РРЛ у Вивершней ради Войводини приме єй подпредсидателька Ана Томанова Маканова.

У Новим Садзе запланована и нащива Петроварадинскей твердинї, Катедри за русинистику на Филозофским факултету, а нащива Новому Саду будзе закончена у просторийох РКПД зоз друженьом и промоцию ЦД-а "Електроника Рутеника".

(конєц) зам

ПЕТРОВЦИ - ДЗЕШАТИ ШВЕТОВИ КОНҐРЕС

Ютре Конґрес у Горватскей

ПЕТРОВЦИ, 6. юний 2009. (Рутенпрес) – Нєшка, 6. юния, робота Дзешатого Шветового Конґрес РРЛ будзе предлужена у Петровцох зоз пленарним зашеданьомє Конґреса. Источашнє будзе отримана и промоция кнїжки Павла Роберта Маґочия “Народ нїодкадз”, по горватски.

Главни орґанизатор конґресного дня у Петровцох тамтейше Здруженє "Руснак", а отримує ше под покровительством Вуковарско-сримскей жупаниї, а у соорґанизациї з ОШ "Антун Бауер" у Петровцох.

Отримованє Шветового Конґреса РРЛ у Петровцох потримал и Совит за национални меншини Републики Горватскей, Министерство култури РГ, як и Општини Боґдановци и Стари Янковци.

Спрам програми, за делеґатох и госцох Конґреса, школяре настави пестованя руского язика и култури зоз Петровцох и Миклошевцох, виведу пригодну културну програму.

Под час Конґресного дня у Горватскей, планована нащива грекокатолїцкей церкви "Покрова Богородици" у Петровцох, а у петровскей Подручней школи будзе отримане Медзинародне стретнуце учительох руского/русинского/лемковского язика, та поетох котри присуствую Конґресу, а госци нащивя и Етноґрафску збирку у Петровцох.

На вечар, КУД "Яким Ґовля" з Миклошевцох, Городске КМД "Дунай" з Вуковару и члени Дружтва "Руснак" виведу културно-уметнїцку програму.

(конєц) зам

РУСКИ КЕРЕСТУР - ДЗЕШАТИ ШВЕТОВИ КОНҐРЕС РУСНАЦОХ

Дюра Папуґа нови предсидатель Шветовей ради РРЛ

РУСКИ КЕРЕСТУР, 8. юний 2009. (Рутенпрес) - Предсидатель Рускей матки Дюра Папуґа зоз Руского Керестура, вчера, 7. юния, остатнього дня Дзешатого шветового Конґреса РРЛ, вибрани за предсидателя Шветовей ради РРЛ - вивершного цела Конґреса.

За подпредсидателя Шветовей ради РРЛ вибрана Марияна Лявинец з Мадярскей, понеже ше, по традициї, за подпредсидателя вибера члена Ради з жеми котра будзе домашня шлїдуюцому Конґресу, а 2011. року то будзе Мадярска.

За секретара Шветовей ради РРЛ вибрани Владимир Противняк зоз Словацкей, предсидатель Русинскей оброди Словацкей.

На остатнєй, трецей пленарней схадзки Дзешатого шветового Конґреса РРЛ, вчера, 7. юния у Руским Керестуре, 82 делеґати Конґреса вибрали и членох новей Шветовей ради РРЛ вибрали Наталию Гнатко з Горватскей, Александра Мошколу з Ческей, Андрея Копчу з Польскей, Дюру Фирцака з Румуниї, Миколу Бобинца з Подкарпатя, з України, Джона Риґетия зоз Сиверней Америки и Мартина Караша, зоз Словацкей.

Мартин Караш зоз Словацкей, на Штвартим Форуму младих РРЛ, на зашеданю Форума у Руским Керестуре, пияток, 5. юния, вибрани за нового предсидателя Форума, а до Управного одбору Форума, спред Форума младих Рускей матки, вибрани Будимир Сабо Дайко з Коцура.

Шветова рада РРЛ од того Конґреса будзе мац и свой Вивершни одбор, котри, попри предсидателя, подпредсидательки и секретара Ради твори ище Андрей Копча, член Ради и предсидатель Здруженя Лемкох зоз Польскей.

Дзешати шветови Конґрес РРЛ на своїм остатнїм зашеданю у Руским Керестуре, за почесного предсидателя Конґреса РРЛ вибрал проф. др Павла Роберта Маґочия, котри остатнї штири роки предшедовал зоз Шветову раду РРЛ.

Делеґати Конґреса на остатнєй пленарней схадзки принєсли и даскельо формални пременки Статута, котри ше одноша на шедзиско Ради (у Прешове), та на Ревизийну (Финансийну) комисию, котра од тераз будзе мац трох членох.

Нови пременки Статута по Єденасти шветови Конґрес пририхта нововибрана Шветова рада, а зашеданє Конґреса закончене з приношеньом його Резолуциї, дзе заключеня Комисийох Конґреса єй состойна часц.

(конєц) зам

ПЕТРОВЦИ(ГОРВАТСКА)-КОНГРЕС

Єдене конгресни дзень отримани у Петровцох

ПЕТРОВЦИ(ГОРВАТСКА), 8.юний 2009.(Рутенпрес)- Всоботу 6. юния єден роботни дзень Дзешатого Конгреса РРЛ отримани у Горватскей односно Петровцох, дзе поднєшени звити конгресних комисийох и їх предклади заключеньох.

Беруци слово пред викладаньом поєдинєчних комисийних звитох др проф Роберт Павел Магочи у Петровцох обрацел увагу на подїї на Подкарпатю оценюци же Конгрес вше будзе потримовац намаганє тамтейших Русинох за припознаванє як окремного народу, алє Конгрес нє будзе потримовац рухи котри тото жадаю витвориц на насилни способ и зоз утвердзевоаньом нових гранїцох бо, " процеси у Европскей униїї иду у напряме сцераня, а нє правеня нових гранїцох".

Як вон наглашел, а то потвердзела и конгресна комисия за запровадзованє попису жительства, же найважнєйшна задача организацийох котри творя Шветови конгрес РРЛ будзе праве пририхтованє за 2011. рок кед ше окончи попис.

Задачи у обласци култури буду усоглашованє терминох отримованя манифестацийох и фестивалох при Русинох як и правенє бази податкох о културноуметнїцких дружтвох а комися за привредне сотруднїцтво пошвидко вироби сайт на котрим буду податки и информациї о Русинох привреднїкох.

Комисия за вирски питаня констатовала проблем грекокатолїкох Русинох у Словацкей и предложене же би ше глєдало приєм у Ватикану, док комисия за видавательство и информованє предложела порядне викладанє друкованих кнїжкох при Русинох и утвердзованє єдинственей библиографиї а новинаре виражели потребу формованя Асоцияциї руских новинарох.

У комисиї за историю гварене же би требало направиц заєднїцку историю Русинох а шицки дилеми коло нєй треба же би ришовали фаховци на наукових сходох и конференцийох.

Организатор конгресного дня у Петровоцох було Дружтво "Руснак" зоз того места и месна школа "Антун Бауер" як и вуковарско сримска жупания чийо представителє поздравели делегатох и госцох Дзешатого Конгресу РРЛ.

Богату културноуметнїцку програму з тей нагоди пририхтали и члени културноуметнїцких дружтвох зоз Миклошевцох и Вуковару.

(конєц) єп

КОЦУР- МЛАДИ РРЛ

Делеґати Штвартого шветового форуму младих РРЛ нащивели Коцур

КОЦУР, 8. юний 2009. (Рутенпрес) –Делеґати Штвартого шветового форума младих Руснацох, Русинох Лемкох всоботу 6. юния, нащивели Коцур.

До нащиви Коцуру пришли учашнїки Форуму зоз Канади, ЗАД, Польскей, Словацкей, України(Подкарпатє), Румуниї, Горватскей и Чешкей а домашнї им були делеґати Дзешатого Шветового конгресу РРЛ зоз Коцура.

Млади нащивели школу дзе их прияла директорка Ксения Медєши. У Месней заєднїци их приял предсидатель Совиту Рафаил Русковски хтори за госцох орґанизовал коктел.

У Етно клубу "Одняте од забуца" младих делеґатох дочекал предсидатель клуба Дюра Макаї хтори госцох упознал зоз националним скарбом Руснацох.

На концу своєй нащиви Коцуру, млади Руснаци, Русини и Лемки були у грекокатолїцкей церкви дзе их дочекал коцурски парох о. Владислав Рац хтори им бешедовал о историї коцурскей парохиї.

Делеґати и госци 4. Шветового форума младих Русинох/Руснацох/Лемкох после нащиви Коцуру, всоботу 6. юния, нащивели Вербас.

Їх пребуванє у Центру за физичну културу "Драґо Йовович" у Вербаше реализоване под поктровительством Општини Вербас.

(конєц) цики/там

РУСКИ КЕРЕСТУР - ДЗЕШАТИ ШВЕТОВИ КОНҐРЕС РУСНАЦОХ

Найзначнєйши точки з Резолуюиї

РУСКИ КЕРЕСТУР , 12. юний 2009. (Рутенпрес) - Заключеня, односно Резолуцию Дзешатого шветового Конґреса РРЛ, 7. юния у Руским Керестуре, поднєсол Мирон Крайкович зоз Републики Словацкей.

Найзначнєйши точки Резолуциї Конґреса РРЛ " же медзи двома Конгресами Шветова рада РРЛ зробела окремну роботу на презентованю шветового Русинства и ришованю його найзначнєйших проблемох".

У Резолуциї тиж стої же членох Шветового Конґресу РРЛ прияти Клуб Русинох и приятельох прикарпатскей Руси з Ческей републики и Закарпатски обласни благодарни фонд “Русинка школа” з Подкарпатя, Україна, а кандидат за приєм до Шветового Конґресу Русинох Русинске здруженє “Карпатска Рус” зоз Русиї.

На закончуюцим зашеданю наложене Шветовей ради же би вимагала приєм делеґациї Конґреса и членох з України при предсидательови України Викторови Ющенкови и предсидательки Влади України Юлиї Тимошенко, и вимагац припознаванє русинскей националносци у України.

Єдна з найважнєйших задачох организацийох котри творя Конгрес будзе пред наступним пописом жительства у жемох дзе жию Русини. Орґанизациї-членїци Конґреса буду водзиц кампанї на опредзельованю и пописованю цо векшого числа Русинох, односно, на доходзеню цо дошлїднєйшого числа Русинох у тих жемох.

У тим напряме, русински орґанизациї ше маю обрацац державним орґаном жемох у котрих жию, з цильом преверйованя же чи ше при попису годно опредзельовац як Русин, кед же то нє будзе оможлївене, треба ше обрациц Ради Европи.

Ґу тому, ту и заключеня формално-правней природи, як цо то же по наступни, Єденасти Конґрес, Шветова рада пририхта вименки Статута Конґреса, а уж на тим у Керестуре, Конґрес пременєл адресу свойого шедзиска, котре и надалєй у Прешове.

Окремну точку Резолуциї Дзешатого Шветови Конґреса РРЛ то же Конґрес окреме дзекує за вельорочну дїялносц проф. др Павлови Робертови Маґочийови, и преглашує го за почесного предсидателя Шветовей ради Русинох.

(конєц) зам

РУСКИ КЕРЕСТУР - ДЗЕШАТИ ШВЕТОВИ КОНҐРЕС РУСНАЦОХ

Конґрес нє потримує сепаратистични намаганя

РУСКИ КЕРЕСТУР, 12. юний 2009. (Рутенпрес) - Конґрес и Шветова рада РРЛ нє потимую екстремни сепаратистични намаганя єдней часци Русинох на Подкарпатю (Україна), наглашел дотерашнї предсидатель Шветовей ради др Павло Роберт Маґочи, бешедуюци на нєдавно отриманим Дзешатим Шветовим Конґресу РРЛ у Руским Керестуре.

Русинство на Подкарпатю треба розвивац през уводзенє настави русинского язика у основних школох (цо ше и роби), окремни успих же формовани ТВ-емисиї по русински на Закарпатю, а як найзначнєйши досяг у витворйованю правох Русинох на тим просторе, Маґочи визначел приношенє урядового ришеня Закарпатскей Обласней ради, у марцу 2007. року, о припознаню русинскей народносци.

- Припознанє Русинох на териториї Закарпатскей обласци за окремну народносц вельки успих русинского руху. Сцели бизме вериц же политични намаганя Сойма и Народней ради, котри започали у децембре 2007. р., нє наробя нєвиправлїви чкоди карпаторусинскому дїлу на України - гварел Маґочи, и наглашел же Конґрес може дїловац лєм як припатрач, а нє и як учашнїк активносцох котри почали у України, лєбо було хторей другей держави дзе жию Русини.

Вон тиж спомнул и проблем грекокатолїцкей церкви, понеже єй грожи виразне словакизованє на териториї Пряшовскей и українизованє на териториї Мукачовскей епархиї.

- Як предсидатель Шветовей ради мал сом стретнуца з владиками у тих владичествох, и шлїдом тих стретнуцох, прешвечени сом же реалне ришенє того проблему мож досягнуц лєм на уровню Ватикану, гварел проф. др Магочи.

Предложене же би ше Шветова радаби стретла з папскима нунциями у каждей жеми дзе жию Русини, алє и же би сотрудзовали зоз грекокатолїцкима священїками, пре правдиве информованє о проблемох котри приоритетно треба ришовац на стретнуцох з представителями Ватикану - гварел Маґочи на Конґресу у Руским Керестуре.

(конєц) зам

РУСКИ КЕРЕСТУР - ДЗЕШАТИ ШВЕТОВИ КОНҐРЕС РУСНАЦОХ

Иножмни новинаре провадзели Конгрес

РУСКИ КЕРЕСТУР, 12. юний 2009. (Рутенпрес) - Попри вецей представительох писаних и електронских медийох зоз Сербиї, роботу Конґреса у Руским Керестуре и Петровцох провадзели новинаре зоз жемох-членїцох Конґреса.

Цали час ту були вецей новинаре зоз Словацкей, Мадярскей, екипа державней ТВ зоз Румуниї, ТВ зоз Ческей, ТВ зоз Ужгороду (Україна), алє и державней ТВ зоз Русиї.

О збуваню на Конґресу писали и медиї у Польскей и Америки, а дзепоєдни новинаре правели окремни интервюи зоз полтичарами Сербиї.

(конєц) зам

РУСКИ КЕРЕСТУР - ДЗЕШАТИ ШВЕТОВИ КОНҐРЕС РУСНАЦОХ

Економска комисия

РУСКИ КЕРЕСТУР, 12. юний 2009. (Рутенпрес) - Комисия за економски одношеня Дзешатого Шветового Конґреса РРЛ у Руским Керестуре на своїм зашеданю заключела же би ше оформело "Русински интернет бизнис центер" котри будзе мац задаток зазберовац податки о русинских поднїмательох.

За ношительох того проєкта задлужени Мирослав Будински и Мирослав Силадї з нашей жеми, котри до конца юлия обдумаю веб-сайт за злїванє и презентованє шицких податкох о привреднїкох и їх дїялносцох, та можлївосцох за сотруднїцтво.

Тиж так, заключене же би ше, пре потребу змоцньованя повязованя и ефикасного хаснованя националних фондох и фондох ЕУ, по конєц септембра почало твориц базу податкох о економских потенциялох у крайох дзе жию Русини, цо будзе початок велького проєкта з цильом формованя мрежи центрох за розвой, сотруднїцтво и економски розвой крайох дзе жию Русини.

У роботи Комисиї на Конґресу участвовали: Стефан Косовски з Польскей, Павел Дупканич зоз Словацкей, Предсидатель Националного совиту Руснацох у Сербиї Славко Орос, народни посланїк у Скупштини Републики Сербиї др Дюра Мученски.

Надалєй, у роботи Комисиї за економски питаня Конґреса участвовали секретар Месней заєднїци Руски Керестур Йоаким Надь, Владимир Емейди, спред Здруженя ремеселнїкох и приватних привреднїкох Руского Керестура, Владимир Бильня з Вербасу, Мирон Джуджар зоз Шиду, Мирослав Будински з Нового Саду, Владимир Бучко з Кули и предсидатель тей Конґресней Комисиї - Мирослав Силадї з Вербасу.

(конєц) зам

СЛОВАЦКА - ОДГУКИ ДЗЕШАТОГО ШВЕТОВОГО КОНҐРЕСА РРЛ

Янко Липински, делеґат Конґреса зоз Словацкей републики

СЛОВАЦКА, 12. юний 2009. (Рутенпрес) - После законченя Дзешатого Шветового Конґреса РРЛ, котри од 4. по 7. юний отримани у Руским Керестуре и Петровцох, на адресу Рутенпресуу сцигли и перши реаґованя на орґанизованє и зашеданє Конґреса у нашей жеми.

Єдно спомедзи нїх то и реаґованє Янка Липинского, делеґата Конґресу спред Асоцияциї русинских орґанизацийох Републики Словацкей, источасно и подпредсидателя Здруженя интелиґенциї Русинох Словацкей.

- Виражуєм барз вельке подзекованє орґанизатором Конґреса - насампредз Руснацом зоз Сербиї, алє и зоз Горватскей. Так як ше им удало орґанизовац Конґрес, то нє лєм пре пенєжи, орґанизацийни таланти, алє насампредз - пре вельке шерцо, гварел Липински.

Вон тиж виражел задовольство пре упознаванє зоз виучованьом руского язика у Сербиї- од основношколского по високошколски возрост, а окреме визначел же "Русанци зоз Сербиї и Горватскей указали же нїяки нє конфликт буц горди Руснак и буц горди державян своєй держави".

- Радує ме факт же Мартин Караш зоз Словацкей постал нови предсидатель Шветового Форума младих РРЛ, понеже и Здруженє русинскей интелиґенциї Словацкей барз потримує Форум младих, гварел медзи иншим Липински.

Ян Липински на сайту www.rusyn.sk , односно його Форуму, число 22, дал и информациї з нашого Рутенпресу о збуваньох на Дзешатим шветовим Конґресу РРЛ.

(конєц) зам