Мойо особне роздумованє2. новембра 2002. року було дзень “Д” за нашу народносц. Вибрани Национални совит Рускей народносци. Цо ше самих виберанкох дотика було розличитих реакцийох: 1. Єдни поплювани, очарнєти, преглашовани за зраднїкох були аж и презадовольни зоз своїма резултатами. После шицкей такей антикампанї пейц места у намесцаним Совиту барз вельо знача. 2. Други розчаровани, гоч трираз меняли тим (двараз обявени у “Руск+овск+им слове”, трецираз тим меняни пред саму Скупштину), гоч ношитель лїстини “моцно и аргументовано” виберал “того сцем - того нєсцем” яґ да тот Совит нашлїдзел од дїда. На концу конца муши сотрудзовац зоз тима цо их найбаржей нє сцел. 3. Керестурци, по моїм власни думаню одбавели праву ствар, добили пейц места, та вше можу контроловац килаши, гоч сом думаня же могли и вецей посцигнуц да вишли, як сцели пред сам початок Скупштини, зоз свою лїстину. Алє, то їх ствар, на котру нєма право нїхто пригвариц. А могли, бо то закон допущує, гоч нам “Руск+овск+е слово” од числа до числа демократски обяшньовало же держава дошлєбодзує лєм єдну лїстину. 4. Цо ше моєй малєнкосци дотика, презадовольни сом, нє прето же сом вошол до Совиту (то велька чесц и обовязка заступац найменєй сто людзох хтори ци дали потписи), алє прето же ше доказало же “шивоглави бачи” Голик бул у праве кед почал писац а “демократичне и вше обєктивне” “Руск+овск+е слово” обявйовац його писаня. “Шивоглави бачи” Голик гварел же национални совит може буц совит лєм єдней народносци, бул поплювани, и бул совит лєм єднeй - Рускей народносци. Иншак нє могло буц. И кед нараз ястреби постали голубки, пременєли пирка та на Скупштини и коло скупштини були лєм “РУСНАЦИ” и вшадзи “РУСНАЦИ”. Стораз сом ше щипал бо сом нє могол вериц же то правда. З часу на час пробовали буц тото цо су, алє видзели же су пречитани. Яки бул моцни аплауз кед поплювали по Рускей грекокатолицкей церкви. Сцели буц векши каталици од само Святого Отца, сцели пременїц церковни закони. А тельо у екипи правнїкове, адвокати, судийове, та аж и нєсудзени паноцове. А кед ше чловек враци дакус назад и здогада ше їх хвалєня як ходза до тей истей церкви (нач?). “Шивоглави бачи” Голик гварел же можу буц вецей лїстини и було. Хтошка гварел же нє знал до рана 2. новембра же буду вецей лїстини, точнєйше думал же будзе єдна. Алє ше нє здогаднул же лїстина “А” нє знала свой шор до самого початку скупштини, ша пре ню початок и пожнєл. Яки бул зожелєнєти ношитель кед дознал же му шицко вимкло контроли. Правда же главни бавяче по кажду цену робели процивзаконито, та так и закончели. У члану 14. Правилника о способу роботи Скупштини електорох за вибор Совиту нациналних меньшинох пише медзи иншим же “Лїстини преглашує предсидатель електорскей скупштини утвердзуюци їх число и ношителя.” А кед воно, єдну лїстину и єй ношитель ше одредзел пред пар мешацами. Алє най им будзе, “Спаш их ...., бо нє знаю цо робя.”. А тельо правнїкове, адвокати, судийове... У истим тим члену пише: “Лїстини кандидатох (далєй у тексту: лїстина) за членох националного совиту може предложиц єдна штварцина присутних електорох.” Як нам добре, у нашим народзе, єст людзох цо напредок шицко знаю, та вец шицко напредок и одлучую. Знаю же будзе єдна лїстина, гоч можу буц штири, знаю кельо будзе електорох, односно єдна штварцина тих истих. Побида преглашена пар тижнї скорей Скупштини, а кед на Скупштини, хтошка ше влапал за главу... На концу того мойого роздумованя, поставим себе (нє шмем другим, бо то будзе причина да ше тото мойо роздумованє нє да до друку, гоч сом вельки песимиста познаваюци политику редактора обєктивного и демократского “Руск+овск+ого слова” же и таке будзе друковане): 1. Чи ше дакеди опатра до жвератка тоти цо на цале гарло кричали “єдна рада двох народносцох”, теди кед им “шивоглави бачи” Голик гварел же то так нє може буц и нє було. Як одступели од своїх идеалох, положели ше на перши места “його лїстини” за Националну раду єдней – Рускей народносци. Чи ше дакеди опатра до жвератка и цо там видза? 2. Чи ше дакеди опатра до жвератка опатра тоти цо так нєдавно поплювали по Преосвященим Владиком преглашуюци го за обичного шверцера. А на самей Скуштини и скорей нєй отримали му казань же вон нє зна цо демократия та нє пушща паноцох на “його лїстину”. А велї з нїх правнїкове, адвокати, судийове (оздаль ше розумя до права) а боме и нєсудзени паноцове, котри би голєм о тим требали добре знац. Лєбо теди нєбули у школи кед ше тото учело, та спадли на испиту и випадли зоз школи. Чи ше дакеди опатра до жвератка и цо там видза и чи себе гваря: Каєм ше. 3. Чи ше дакеди опатра до жвератка опатра тоти цо других оклеветали за нєморал и же ше нє можу радзиц лєм вадзиц а у своїм власним дворе ше нє можу порадзиц коло нєморала. Чи ше дакеди опатра до жвератка и цо там видза? 4. Чи ше дакеди опатра до жвератка опатра тоти цо себе вжали за шлєбоду да на таки датум нє поволаю Руску грекокатолицку церкву (кед же су уж таки церковни) кед нє пре инше алє (як то гвари мой народ – нє знам и їх) голєм пре шор. Бидни вони нє знали кого волац а нє знали анї чи Преосвящени Владика ту (як да Руснацох єст 20 милиони а нє тисячи та ше нєзна хто ту а хто нє). Чи ше дакеди опатра до жвератка и цо там видза и чи себе гваря: Каєм ше. Я одвити знам, а ви...
Янко Голик Керестурец жиє у Новим Садзе фирма му у Беоґрадзе роби по цалим швеце nadpomnuce: pan Golik ma obecunku direktora Ruskogo slova `e tot tekst budze obyveni u Ruskim slove.
|