Почитовани панє предсидатель Шветовей ради
Русинох П.Р. Магочи
Мойо роки и шицко цо сом прежил
даваю ми за право бешедовац о себе и о шицким коло себе, та
най ми будзе дошлєбодзене щиро и добредзечнє зоз почитованьом за Вас
особнє и вашо намаганя, повесц же становиско завжате на
нєдавней схадзки Шветовей ради у Букурешту одруциц декларацию Сойма
Русинох Карпатскей обласци зоз арґументом же "барз здабе на
провокацию"/!?/ нє принєше добре анї гевтим там Русином у України,
анї нам ту, у Сербиї, и других у европских державох, анї шветовому
руху Русинох.
Таке становиско дзелї русински
национални корпус на два часци, на Заходни и Восточни, на
Греко-Католїчки и Православни, дава за право тим моцом котри Русинох
хасную у нєшкайших политичних нацагованьох Москви и Вашингтона
коло України. Гоч як ше тото там закончи, а жадаме най ше за Україну
закончи найлєпше, Русини там прейду найгорше. А пошлїдки того
будземе мац и ми ту у Сербиї. Знаце ви же хто ту, у Сербиї, водзи
политику спрам Руснацох, и як ше одноша гу тей политики нашо
представителє зоз Рускей матки, националного совиту, информативних
медийох, катедри за Русинистику, знаце прецо ту бул тедишнї министер
вонкашнїх дїлох, нєшка спикер ВР Явенюк!?...
Алє, тераз нє о нас ту слово,
слово о Русинох Закарпатскей. Озда у тей Декларациї було и могло
найсц и афирмовац на першим месце арґументи хтори дали за
право Русином у України поволац ше на историйни факта и нєшкайши
обставини у хторих жию и глєдац тото цо маю Русини широм швета.
Прецо им зоз тей схадзки у Букурешту перше нє дата потримовка за
намаганя достац припознанє националного идентитету, статус
националней меншини и шицки права яки им припадаю по Повелї ОУН и
декларацийох о чловекових правох и шлєбодох котри потписала и
Україна, а нє почитує их - а вец дац зауваги о часу у котрим
Декларация принєшена, словох зоз хторима є написана, итд. . А вец,
знова у вязи зоз Декларацию осудзиц политику Коминтерни и чарного
українского национализма спрам Русинох у України и сушедних жемох.
Место потримовки у тим
Карпатски Русини достали по хрибце. Можебуц ту треба глєдац и
одвит на питанє прецо представителє Русинских организацийох
Карпатскей обласци нє участвовали на тей схадзки.
Залїчиц би Вам тото, почитовани панє Магочи,
а будзе барз чежко.
Модлїм примце мойо почитованє, Михал Горняк
РУСКА МАТКА
