|
IN MEMORIAM
НОВИ САД, 15. марец 2008. (Рутенпрес) – Нєшка 15. марца у Новим Садзе нєсподзивано у 72. року живота умар визначни руски писатель и култруни дїяч Дюра Папгаргаї. Дюра Папгаргаї народзени у Руским Керестуре 11 новембра 1936. року. Закончел Филозофски факултет ґрупу за югославянску литературу и язики 1964.року. Службовал у Вербаше, Руским Керестуре и Новим Садзе, перше як просвитни роботнїк а познєйше як новинар и редактор у новинох "Руске слово". Од 1966. року находзи ше на длужносци главного и одвичательного редактора часописа "Шветлосц" одкадз 1993. року одходзи до пензиї. Писал поезию и прозу, драми, занїмал ше зоз литературну критику а окремну прихильносц указовал спрам театру. Бул активни у театару "Дядя" , а як директор драми єден час робел у новосадским Сербским народним театру. Єден є з сновательох фестивалу "Червена ружа" и манифестациї "Костелникова єшень". Обявел коло 30 кнїжки, литература му прекладана на велї язики а його твори присутни у велїх антолоґийох. Дюра Папгараї у своїм богатим творительним живоце достал скоро шицки релевантни награди за досяги у културним творительстве од тих котри додзелю руска заєднїца и єй институциї по Вукову награду и награду "Александар Духнович". Од прешлого року є ношитель националней пензиї котра ше додзелює за окремне доприношенє у култури на националним уровню. Дюра Папгаргаї будзе поховани на пондзелок, 17.03.2008 року на 14 годзин у Руским Керстуре.
( конєц) єп/мб
|
