|
Мармарош-Сіґет, 23. 6. 2007 Ёго Святость папа Бенедікт XVI. Ватікан Жаданя делеґатів і гостїв 9. Світового конґресу Русинів о узнаню Русиньской ґрекокатолицькой церькви сиу иурис і выменованя в рамках нёй єпіскопа про Русинів Ваша Святость, мы, підписаны члены Світовой рады Русинів, котры сьме представителями русиньскых културных орґанізацій із десятёх країн, зьєдиненых у Світовім конґресі Русинів і зышли сьме ся 21. – 24. юна 2007 на 9. конґресовім засіданю у містї Мармарош-Сіґет у Румуньску, в першім рядї поздравуєме Вас, Ваша Святость, а єдночасно несеме Вам од імени Русинів-ґрекокатоликів щіры молитвы, котрыма выпрошують у Господа Бога про Вас, намістника Ісуса Хріста на Земли, міцне здоровя і гойность Божых милостей. На світовім конґресовім засіданю были обговерены проблемы жывота Русинів у світї, главно їх културного –народностного розвоя, узнаня їх націоналных прав в окремых штатах, де жыють у великій мірі. Міджі обговореныма проблемами была і сітуація Русинів-ґрекокатоликів на Словеньску, котры чують кривду в подобі неузнаваня їх права на поужываня материньского русиньского языка в літурґічных обрядах, права обсаджованя парохій із русиньскама віруючіма русиньскыма священиками, права приправы русиньскых богословців на пасторацію міджі русиньскыма віруючіма в русиньскім языку. Русиньскы священици ся уж в 1997 роцї а потім у 2003 роцї обернули на Вашого попередника, Святого Отця Яна Павла ІІ. зо жаданём о офіціалне узнаня Русиньской ґрекокатолицькой церькви суи иурис на Словеньску, а тыж зо жаданём установити єпіскопа про тоту церьков. Але тото дїло доднесь не было вырішене. Русины собі усвідомлюють тяжкость выряшіня їх жадань, але поважують їх за такы, на котры мають право подля світьскых і церьковных законів. Зато з довіров і надіёв ся обертаме на Вас, Святый Отче, і віриме, же їх просьбы будуть выслуханы. Їх надії в тім часі здають ся быти підсилены Вашым звышеным інтересом о діятельство в католицькій церькви на Словеньску, о котрім сьте были інформованы при недавній навщіві єпіскопів зо Словеньска у Ватіканї, але і о снагі створити ту новы єпархії. І кедь была в 1968 роцї русиньска церьков свого права записана в Аннурио Понтифицо як словеньска, а первісна русиньска ґрекокатолицька церьков перестала єтвовати, але она хоче заховати собі свою ідентічность і розвивати реліґійне і културну дїдовизнз своїх русиньскых предків, о чім свідчіть і то, же при послїднім зрахованю жытелїв на Словеньску в роцї 2001 ся ку материньскому русиньскому языку приголосило 35 тісяч ґрекокатоликів. Ваша Святость, в менї Русинів-ґрекокатоликів, вірных одказу Кіріла і Мефодія і найсвятїшым традіціям выходного церьковнославяньского обряду, котры зъєдиняють ґрекокатоликів-Русинів нелем на Словеньску, але і на Українї, в Польску, Сербії, Хорватьску, Мадярьску, Чеську, Споєных штатах америцькых , Канадї, але і інде у світї, котрых представителї репрезентують своїх братів і сестры і на 9. Світовім конґресі Русинів у Румуньску, просиме Вас, жебы сьте з позіції Вашого Найсвятїшого уряду выслухали голос ґрекокатоликів-Русинів зо Словеньска і вырішыли проблем зо зновустворінём Русиньской ґрекокатолицькой церькви на Словеньску і настолїнём єй русиньского єпіскопа. За тото дїло будуть Вам вдячны і будуть благоречіти Ваше рішіня нелем сучасны русиньскы ґрекокатолицькы віруючі, але і їх потомкы. Слава Ісусу Хрісту! З великов почливостёв члены Світовой рады Русинів як выконного орґану Світового конґресу Русинів:Председа Павел Роберт Маґочій (Северна Америка)Підпредседа Дюра Папуґа (Сербія) .Члены СРР: Маріанна Лявинець (Мадярщіна) Юрій Фірцак (Румунія) Аґата Пілатова (Чехія)Владимір Противняк (Словакія) Андрій Копча (Польща) Наталія Гнатко (Хорватія) Таёмник СРР Александер Зозуляк (Словакія)––––––––––––––––––––––––––––––––––––––––––––––––––––––––––––––––––––––––––––––––––––– Representation in Canada, Croatia, Czech Republic, Hungary, Poland, Romania, Serbia, Slovakia, Ukraine, United States of America |
