|
На Рутенпресу обявена тота информация котра ме нагнала написац коментар. НОВИ САД – САМИТ Предсидатель України ше стретнул зоз дияспору у Сербиї НОВИ САД, 19. юний 2009. (Рутенпрес) – Предсидатель України Виктор Ющенко ше вчера на його инициятиву стретнул у Городскей скупштини зоз представнїками дияспори у Сербиї. Вон поволал представнїкох українскей и рускей националней меншини на розгварки же би чул у яких условийох жиє українска дияспора у Сербиї и зоз якима ше проблемами и чечуцима питанями стрета. Предсидатель Ющенко бешедовал о обставинох у України и єй намаганю у европских интеґрацийох и демократизациї дружтва. Як Ющенко наглашел предлусловиє нєзависносци України була єй демократизация, а єй будучносц то европска интеґрация и дзбанє о своєй дияспори хтора, по його словох, окончує чежку мисию, бо ше намага зачувац свой идентитет, културу, язик и виру як и шириц українску традицию. Прето Україна як матична держава пороби шицко цо у єй можлївосци же би помогла своєй українскей и рускей дияспори, як у Сербиї так и у швеце. Вон гварел же є задовольни зоз тим цо поробел од кеди є предсидатель України же вона очевисно идзе напредок и же ше у нєй случую рижни процеси хтори ю приблїжую ґу Европи. Предсидатель Ющенко бешедовал и о духовней сфери и аспекту мултикофесийносци и його уплїву на розвой держави, як и колективней безечносци хтора нєобходна України же би ишла и надалєй по добрей драги. На концу предсидатель дал слово представнїком українскей и рускей националней меншини. Так предсидатель Националного совиту Українцох Мирослав Калєнюк предсидательови Ющенкови потолковал обставини у хторих жиє малочислена українска меншина у Сербиї и яки можлївосци ма за витворйованє своєй култури и идентитету. Предсидатель Националного Совиту Руснацох Славко Орос предсидательови України представел кратку историю приселєня Руснацох на тоти простори, а предсидатель Союзу Руснацох Українцох Сербиї Боґдан Виславски поинформовал предсидателя Ющенка о мисиї хтори Союз окончує же би Руснаци и Українци на тим простору сотрудзовали. Домашнї того сходу бул Амбасадор України у Сербиї його екселенция Анатолий Олїйник, а сходу окрем конзулох и аташеох Українскей амбасади присуствовали и владика кир Георгий Джуджар, о. Роман Миз, посланїки Леона Виславски, Олена Папуґа и Дюра Мученски, представнїки Националних совитох Українцох и Руснацох, Союзу Руснацох Українцох Сербиї, Заводу за културу войводянских Руснацох, Дружтва "Просвита", Сербско-українкого товариства, културно-уметнїцких дружтвох и других наших здруженьох, як українских и руских медийох. (конєц) ад Цо повесц о тим? Знова ше потвердзує моя (и нє лєм моя) теза же Руснаци у Сербиї муша вимагац од держави Сербиї же би защицела своїх державлянох котрих припознава як окремни народ и котра финансирала нєдавно отримани Шветови Конґрес Русинох/Руснацох/Лемкох. Предлужує ше акция "свидомих Руснацох Українцох" у опасульованю нас нєсвидомих и глупих руснацох котри нє можу похопиц же дзецко старше од оца, же Руснаци у ствари Українци, и же треба да ше цешиме же ше вони намагаю помогнуц нам же би и ми постали свидоми, же назва Руснак лєм єдно старе, превозидзене мено котре ше муши заменїц зоз НОВИМ, КРАСНИМ и СУЧАСНИМ меном Українєц.То же там були представителє Українского Националного совиту та и Союза Русинох Українцох ми зоз шицким логичне алє же бул предсидатель и представителє Руского Националного совиту ме шокирало. Цо вони мали там робиц? Чи вони вообще свидоми же на тот способ дали леґитимитет першому виреченю у вистки зоз Рутенпреса : " Предсидатель України ше стретнул зоз дияспору у Сербиї." Чи то вец значи же представителє нашого Руского Националного совиту припознаваю же зме Українска дияспора. Знам же ми предсидатель Славко Орос, кед го о даскельо днї будзем питац цо там робел, пове же то висока политика и же ше я до тоґо нє розумим. То випатра така барз висока политика же ю анї єден Руснак нє розуми. Можем прилапиц його присуство на тей конференциї, або цо уж було, лєм у случаю кед же ше пан Орос питал панови Ющенкови кеди припознаю Русинох и чи на пописованю жительства у України 2011 року будзе окремна рубрика РУСИН. У шицких других случайох барз вельо страцел у моїх очох и пре то ми барз жаль бо сом го наисце почитовал и як предсидателя НС и як Руснака. Кратка история о досельованю Руснацох на тоти простори пана Ющенка, сиґурни сом, интересовало исто як цо нас интересує кеди и чом ше Ескими селєли зоз єдного на други край подруча дзе жию.Мирослав Силадї
|