Одвит професора Пола Роберта Маґочия академикови Юлиянови Тамашови

З нагоди текста академика Юлияна Тамаша о положеню националних меньшинох у Сербиї а зоз окремним оглядом на положенє Руснакох, обявеним у дньових новинох "ДАНАС" 10-11. децембра 2005. року, под насловом "Орнаментални доказ же цар велькодушни" редакциї ше явел канадски професор Пол Роберт Маґочи. Академик Тамаш у своїм тексту винєсол твердзенє же же професор Маґочи нє академик алє член кральовского дружтва историчарох Велькей Британиї и критички бешедує о здруженю руснакох чиї инициятор бул професор Маґочи.

У своїм демантию, професор Маґочи виявює же нїґда нє бул член було якого професийного здруженя у Велькей Британиї. Вон гвари же є 1996. року вибрани за урядового члена Академиї хуманитарних и дружствених наукох Кральовского дружтва Канади, цо формално потвердзене и з боку тедишнього премиєра канади Жана Кретиєна.

У вязи зоз Шветовим конґресом Руснакох, чийо дїлованє академик Тамаш оценєл як чкодлїве за интереси руснакох професор Маґочи дал слїдуюцу вияву:

"Шветови конґрес Руснакох то федерация орґанизацийох хтори ше стараю о спонуканю националних, културних и економских интересох Руснакох у цалим швеце. Його члени заступаю становиско же Карпаторусини (Русини, Лемки, Руснаци) окремни славянски народ хтори би требал буц припознати од власцох у шицких жемох у хторих жию.

Шветови конґрес Руснакох основани у марцу 1991. року и нєшка ше состої од дзевец орґанизацийох – стаємних членох и даскельо придружени орґанизациї. Перши орґанизациї хтори вошли до составу Шветового конґресу були: Зоз Польскей Здруженє Лемкох, зоз Словачкей Русинска оброда, зоз України Общчество карпатских русинох, зоз ЗАД Карпато-Русински Виглєдовацки Центер и зоз тедишнєй Юугославиї Руска Матка. Потим ше Конґресу почали придружовац, як стаємни члени, орґанизациї зоз Мадярскей (Орґанизация Руснакох у Мадярскей), зоз Чешкей Републики (Дружтво приятелєох Подкарпатскей Руси), зоз Румуниї (Културна уния Руснакох у Румуниї) и зоз Републики Горватскей (Дружтво "Руснак"). З роботу Конґресу руководзи Шветова рада руснакох. До єй составу уходзи по єден представитель зоз каждей од дзевец орґанизацийох хтори його стаємни члени. На чолє Шветовей ради предсидатель, а у першей децениї роботи конґресу (1991 – 2001) то бул Василь Турок Хетеш зоз Словацкей. Двомешачни маґазин "Русин" (1991) функционує як официйни орґан Конґреса. Конґрес ше отримуйе на кажди два роки у єдней од жемох дзе жию Руснаци. До тераз конґреси отримани у: Словацкей (Медзилаборци, 1991.), Польскей (Кринїца, 1993.), Югославия (Руски Керстур, 1995.), Мадярска (Будимпешта, 1997.), Україна (Ужгород, 1999.), Чешка Република (Прага, 2001.), Словацка (Прешов, 2003.), и Польска (Кринїца, 2005.). У рамикох даєдних конґресох були отримовани и науково конференциї хтори утвердзели заєднїцки проєкти на хторих буду робиц русински орґанизациї зоз вецей жемох: обявйованє антолоґийох поезиї и прози, пословни аранжмани, черанка културних и просвитних програмох. Велї особи од авторитету и представителє власцох тримаю Конґрес Русинох за орґан хтори репрезентує интереси Руснакох" – гвари ше у вияви професора Маґочия хтора доставена редакциї дньовнїка "Данас"