|
Я особнє нє видзим причину прецо би ше ми, правдиви Руснаци/Русини/Лемки вообще возбудзовали и реаговали на, найблагше поведзено, глупосци и кретенизми продукту хорого розума(?), давно прешлих часох и предатих душох руских/русинских "потурицох". Нам треба `е би було ясне же кед ше ладя чиря, патканї ю перши напущую. Медзитим, кед нє маю дзе пойсц вец кусаю и розтаргую шицко и шицких доокола, та и самих себе. А хто нє шлєпи попри очох, йому ясне же хтора и чия ше ладя уз глїбоко зачирела, а фалати з нєй одпадую. Барз ше ми пачи обявени текст. Видно же є писани зоз очивидну намиру "освидомиц" нє освидомених, тй. гевтих хтори нє знаю цо су. Єст, лєм єден, малючки проблем, а то же як освидомиц цали Швет, тй. шицки гевти держави и народи, медзинародни организациї и институциї хтори ясно и нєдвозмислово припознаваю Руснацох/Русинох/ Лемкох за окремни и самостойни народ, додзельуюци му медзинародну идентификацию припознатого самостойного народу и язика и шицко цо вєдно з тим идзе. Як ше ми видзи, тим "освидоменим" найвекши "церень у оку" праве гевти держави хтори ясно дали до знаня (а найвецей по кишенки, то мож аж и у "Руским слове" пречитац) же Руснаци/Русини на єден, Украйинци на други бок, а гевти "тамаль-тадзи" (зоз, а чи без смужки, шицко єдно), як ту нє так давно єден челєднїк гварел, можу пойсц... Алє, то нє наш РУСКИ/РУСИНСКИ/ЛЕМКОВСКИ проблем. То проблем тих и таких одруткох на шмециску историї и остаткох прешлих часох хтори Духновича, Добрянского, Жатковица, Костельника и велїх других и подобних преглашую за будительох истих гевтих хтори би найволєли кед би спомнутих и велїх нє спомнутих руских/русинских творительох анї нє було. По правдзе поведзене, нє чудовало би ме кед би исти тоти "освидомени" о даскельо мешаци и напр. Дюру Папгаргая преглашели за "освидоменого" велького будителя и єдного од найзначнєйших "освидомених" културних творительох. Но, досц цинизму. Єдна ствар муши буц ясна: Русини Подкарпат'я гварели (а мнє ше особнє видзи же и витворели) цо сцу, пачело ше то дакому, лєбо нє. Подкарпатска Рус реалносц хтору хто як, алє лєбо ю прилапи лєбо нє. Скорей, лєбо познєйше. Маме вшадзи доокола коло нас приклади цо се случує кед ше народ нє слуха, алє ше шицко пробує ришиц зоз силу. То нїҐда нє дало позитивни резултати. Напроцив. Нам хтори здавен давна, тй. од вше знаме хто зме и цо зме та нам нє треба ньихто (а найменєй було хто з боку) же би нам нєпреривно, з децениї на децению, то гуторел и пояшньовал, бо, гат вон як барз мудри, а ми шицки други глупи, маме пред собу вельки и велїчезни задаток о 4 месаци пририхтац, привитац, погосциц и найважнєйше, указац нє лєм своїм шестром и братом Русином/Руснацом/Лемком, алє и цалому швету цо зме за тоти вецей як 260 роки на тих просторох поробели и зробели же би зме були и остали РУСНАЦИ! Организация ювилейного 10.-го Светового КонҐресу Руснацох/Русинох/Лемкох и 4.-го Шветового Форуму Рускей/Русинскей/Лемковскей младежи у нашей жеми, велька чесц, алє и обовязка. Привитац вецей як 200 делеҐатох, госцох, членох Парламентох жемох у хторих Руснаци/Русини/Лемки жию и дзе су припознати (а припознати су вшадзи окрем у держави хтору би нам гарсцочка "удрилїц" за...), дзепоєдних политичарох тих земох и визначних Руснацох/Русинох/Лемкох, од церковних, прейг културних та по привредних представительох нашого Рускохо народу, представя спокусу моци Рускей матки хтору вона, прешвецени зме, сполнї. Но, Руска матка ту нє сама. Мац полну потримовку, и то нє лєм декларативну, держави то велька ствар. То се нє здобува за єден дзень, лєбо так же дахто од познатих хвильково на даякей позициї. Така потримовка краткого диху, бо "нїчия нє горела до рана". Руска матка зоз свою ясну и нєдвозмислову политику очуваня руского националного идентитету и скарбу вше отворено була на боку самостойного, руского народу. А то укаже и потвердзи и на наиходзацим ювилейним 10.-им Шветовим Конгресу Руснацох/Русинох/Лемкох у юнию того року у Руским Керестуре. Цо думаю о "плану за ришованє питаня Русини Украйинци", Русини Подкарпат'я ясно гварели 01.12.2008. року (тй. випатра же тот план и тото питанє вони ришели и то по кратким поступку), а Росийска Дума, Совит Европи и други, поведза тих дньох. А кед слово о памфлетох подобних тому тексту, думам зе их треба зачувац. За кажди случай. Нєодлуга их будзе требац "штуриц под нос" тим цо су тераз "освидомени", а нє одлуга буду ше вияшньовац як (лєм) Руснаци/Русини/Лемки векши од Духновича (парафраза на "векши католїки од папи").
|