РУСНАК ИНФО

In USA: 1817 121st Ave. N.E., Blaine MN 55449
In Canada: PO Box 21133, Saskatoon SK S7H 5N9

Видате: 17. новембер 2009

МИНЕАПОЛИС/САСКАТУН: Витворена коалиция шейсц Карпато-Русинских културних орґанизацийох зоз Зєдинєних Америцких Державох и Канади хтори ше здружели до новей заєднїцкей асоцияциї змоцнїц сотруднїцтво и цо частейши догварки.

Карпато-Русински Консорциюм Сиверней Америки оможлїви Карпато-Русином у Сиверней Америки цо ефикаснєйше дїйствовац по питаньох своєй заєднїци у ЗАД и Канади и виступац у мено Карпато-Русинох у европских державох зоз хторих походза.

Консорциюм тиж так будзе представяц Сиверно-Америцких Карпато-Русинох у Шветовей ради Русинох/Руснацох/Лемкох хтора ше сходзи кажди шейсц мешаци и орґанизує Шветови конґрес Русинох/Руснацох/Лемкох кажди два роки.

До Консорциюма ше здружели: Карпато-Русински виглєдовацки центер (Ню Йорк, Ню Йорк), Карпато-Русинске дружтво (Питсбурґ, Пенсилвания), Русинске здруженє (Минеаполис, Минесота), Руске дружтво Сиверней Америки (Киченер, Онтарио), Русин – Саскачеванске дружтво рускей култури (Саскатун, Саскачеван) и Шветова академия русинскей култури (Торонто, Онтарио).

Консорциюм ма двох предшедаваюцих, єден зоз ЗАД а други зоз Канади. Карен Вариан, предсидателька Русинского здруженя, вибрана за предшедаваюцого зоз ЗАД, а Любомир Медєши, секретар Саскачеванского дружтва рускей култури, за предшедаваюцого зоз Канади. "Карпато-Русински орґанизациї Сиверней Америки доросли до такого ступня же шицки нашо орґанизациї можу координовац свойо активносци на таки способ же би посцигли цо векши ефект", гварела Вариян. Медєши додал: "Сиверно Америцки Русини иду шлїдом способу сотруднїцтва яки добре послужел орґанизацийом наших сонароднїкох у жемох походзеня".

На сновательней схадзки 31 октобра того року Консорциюм визначел приоритетни активносци хтори треба запровадзиц, а медзи нїма слїдуюци:

• Утвердзиц и означовац Дзень Русинох у ЗАД и Канади;

• Сотрудзовац зоз Америцким бироом за попис жительства и Статистику Канади же би карпатко-русинска националносц (походзенє) була правилно назначана у надиходзацих пописох жительства, а тиж так резултати обявени;

• У Вашинктонє и Отави отримовац започати контакти зоз амбасадами Европскей заєднїци и державох у хторих Русини жию;

• Отримовац вязи зоз кондзелариями Папского Нунциї у ЗАД и Канади коло зопераня примушоюцого однародзованя Русинох у Греко-католїцкей Церкви у Словацкей и України.

Карпато-Русини то славянски народ по походзеню зоз реґиону Карпатских горох у восточно-централней Европи. По Другей шветовей войни їх етнїчна територия роздзелєна вошла до вецей державох, Словацка, Україна, Польска, Мадярска и Румуния, а векше число Русинох тиж жиє у Ческей, Горватскей, Сербиї, Канади и ЗАД. Коло 1.2 милиона жиє у Европи. У Зєдинєних державой єст коло 700.000 людзох карпато-русинского походзеня, а у Канади коло 20.000.