| Кому завадза руске мено? Наш календар по тераз пременєл пейц мена, пейц раз бул прекресцовани. Ясне ми же го комунисти прекресцовали и брали му мено руски. Алє ми нє ясне тераз, кед маме подполну шлєбоду виражованя, кед ше нїхто звонка нє миша до нашого видавательства, чом ше у його назви утаргує атрибут руски. Маме Руски Керестур, або як го Костельник наволал: руска слава, – двацец езром мац и глава. Маме новини Руске слово, Руску матку, Руску катедру, Дружтво за руски язик, на ТВ Маґазин по руски, радио емисиї по руски, руску ґимназию, маме Ґраматику руского язика, руску литературу, руских малярох, Дружтво Руснацох у Суботици итд. Прето ми нє ясне чом календар нє може мац атрибут руски. Хто то тот цо му руске мено завадза? Най ми арґументовано одвитує прецо сцека од свойого власного мена. Кед би нам власц бранєла хасновац свойо мено, та бизме ше мушели помириц зоз судьбу. Алє кед ше од нього сами одрекаме, то ми випатра далєко од розума. То нє лєм мойо власне думанє. З вельома людзми сом бешедовал у Коцуре и шицки ше складаю, кед треба позберам и подписи, же треба же би ше наш календар и надалєй волал руски.Кед бим сцел указац наш календар чловекови нє нашей народносци и похвалїц ше же то наш руски календар, мал би ше ми право опитац: "А дзе же пише же є руски?" Критикуєме тих цо уписую дзеци до сербских класох, а ми сами робиме тото исте – сцекаме од свойого мена. Єст ище вельо арґументи цо ми даваю за право. З почитованьом Владимир Сабодайко Коцур, Петефи Шандора 33
|
