|
Димитрий Сидор – СБУ окончує виновне дїло процив русинскей нациї 28.04.2009 http://www.regnum.ru/news/1156819.html У децембру 2008. року СБУ (служба безпечносци України) обвинєла предсидателя Сойма подкарпатских русинох, протоєрея Димитрия Сидора за виновне дїло по точки 110 виновноґо закону пре загрожованє териториялней цалосци України. Обвинєнє ше темеьи на резолуциї Другого европского конгреса котри 25. октобра 2008. року принєсол акт о созданю русинскей державносци а у статусу Републики Подкарпатска Рус у составе України. О тим як ше там розвива сутуация, вязано за виновне дїло за котре ше обвинює русински активиста бешедовал 17. априла у интервюу дописовательови аґенциї ИА РЕҐНУМ сам о.Димитрий. Виновне дїло процив мнє под числом 499 у ствари унапрямене процив русинскей нациї. Мнє обвинєли за сепаратизем нє пре то, же я сепаратиста, алє пре то же у українских законох нєт даяки други параґраф, за котру ни ше вони могли заквачиц и судзиц мнє. Пре то вони нашли два баби зоз Институту держави и права, котрим розказали, кед же сцеце и далєй робиц вец у резолуциї Мукачевского конґресу найдзце гоч даяки шлїди сепаратизма и поволованя на загрожованє територийней цалосци України. Тоти баби так и написали – директни поволованя нєт алє єст поштредни. На основи поштредних сумньох вони порушели виновне дїло. Коло того така експертиза нє може буц основ за порушованє судского процеса, а верховни суд и забранєл робиц правни експертизи, бо таки експертизи може робиц лєм суд, котри ше нє муши руководзиц зоз експертизами з боку. У України зоз ескпертами жонґлираю як цо дакеди робел Сталїн. Кед ше правдивосц опредзелює лєм на основи даякей експертизи вец то вишмейованє зоз правами чловека. Експертиза нє закон. Я гварел свойому вишлїднїкови же я нє увредзени з вашого боку бо вам наказали же би сце ме обвинєли, алє то гроженє мойому достиїнству и моєй шлєбоди. Я гласал за Україну скорей 18 роки, кед ше ви, можебуц, ище бавели у писку. Нешка ви мнє обвинюєце за сепаратизем. Кед Києв почал прицискац, месне оддзелєнє СБУ ше почало виживйовац надомну. Претресали церкву у котрей я служим, бегали по церкви зоз пиштолями и *глєдали* якогошик "беґунца". Други раз пришли, розтресли редакцию новинох "Подкарпатская Русь" и вжали штири компютери, єден одняли з рукох моєй дзивки. Запечатовали компютер и дали єй квиту о тим же нє будзе уключовани без єй присуства. Но вон бул уключовани и без нєй, и тужительство написало писмо у котрим ше гутори же "у вашим компютеру нашли зме шлїдо потупйованя ... " Я християн и де-юре граждан Подкарпатскей Руси, котра сцела войсц до составу України . Но, Україна уж 18 роки нас нєсце прияц до свойого составу и увесц референдумску волю нашого народу до Уставу. Вони ми гуторя "Ми судзиме граждана України." На котрей основи? До теди док референдумска воля нашого народу, котри гласал за нєзависну Україну, нє войдзе до Уставу, Устав нє може буц до конца леґитимни за наш реґион, бо вон нє одражава волю народа того реґиона. Ми уш 18 роки упарто вимагаме же би наш реґион бул озаконєни у составе України, же би наш статус бул уставни. И пре то же сом стримовал русински рух од радикализма, мнє обвинюю за сепаратизем, гоч у стварносци я бул ґарант одсуства сепаратизма! Тераз русински рух, гоч мнє тримаю дома у гарешту, принєсол ришенє преглашиц нєзависносц. Тому сом нє присуствовал. За радикализацию русинского руху виновата українска власц. Русини ше нє наздаваю же, пре радикализацию вимогох русинского руху, Києв пременьи свою политику. Тераз наступи моцна етнодискриминация, котра будзе мас шицки призначки ґеноциду. Заход, у лїцу Европскей Униї и ЗАД, патри на то як да то нїч, то там проблеми правя якиш про-московски типи. Забуваю же ту слово о правох чловека, о правох єдного малочисленого народа, о правох националней меншини. Американци пре таке руцали бомби на Сербию. Но у Закарпатю, по їх думаню, то робя свойо своїм. Вони думаю: "гей, у України єст вельо потупйованя правох чловека, алє то робя нашо симпатизере, та их нє треба рушац." Русини нє сепаратисти. Нємали ше за цо заквачиц же би ми судзели, та пре то були примушени глєдац иглу у брадлу шена и наволац чарне билим а биле чарним. Грожа ми же ме осудза. Верим им, бо у України нєт суда- єст лєм даяка писарница котра зроби цо єй накажу. Процив мнє роби тужительство, суд и СБУ, котих у єдних новинох наволали "тройка". То права сталїнистчна тройка. Сталїна, котрого обвинюю за гладомор, славя на плю ґеноцида над русинами. Русини патра на шицко тото и раз направя свой конєчни вибор.
|