РУСНАК ИНФО

Пияток 12.02.2010. року ше у Прешове, у конґресней сали хотела Дукла одбула конференция котра мала мац медзинародни характер а котра була пошвецена монс. Янови Хирикови, як чловекови котри мал цепли чувства спрам Русинох. Уж пред конференцию и гевти нєзаинтересовани ше питали чом конференция зоз медзинародним характером орґанизована и пошвецена баш монс. Хирикови, котрого векшина русинских грекокатолїцких вирних чувствує неґативно. Вон нє же нє розришел русинску проблематику у рамикох грекокатолїцкей церкви алє, напроцив, бул инициятор словакизациї у нашей церкви.

Велї Русини за словакизацию обрядох обвинюю терашнього владику Бабяка, но ту ше муши констатовац же вон лєм вошол до гайзибану котрого порушал монс. Хирик у прешлосци. Велї зоз учаснїкох ше наздавали же конференция будзе одвит на факти зоз историї, котри нїхто нє може пременїц анї самовольно интерпретовац. Но нє случело ше так. Конференция була вельки скандал и велька ганьба за нас Русинох. Участвовало "аж 20 особи" а од медзинародного карактеру була барз далєко. Була нєобєктивна а учасц нє мали представителє русинских орґанизацийох, котри у русинским руху дїйствую уж вельо роки.

Найвекши фияско бул то же на конференциї нє участвовали анї грекокатолїцки священїки, за котрих би монц. Хирик мал буц нєоддзелїва часц їх пастирского живота. Тота статя нє зменшованє значеня дїлованя монс. Хирика бо вон ма и заслуги за котри му треба буц подзековни. Информация о тей подїї пре орґанизаторох. Орґанизатор тей акциї була новоформована орґанизация Здруженє Русинох Словацкей, котрей предсидатель мґ. Растислав Зима. Тота орґанизация нєма нїяке моралне право заступац шицких Русинох у такей чувствительней теми як тота а анї дзековац монс. Хирикови у мено шицких Русинох. Коло ЗРС анї єдна Русинска орґанизация нє мала учасц на тей конференциї.

Шицким Русином ясне же монс. Хирик за нїх нє зробел нїч. То историйни факта котри нє можу пременїц анї сами орґанизаторе акциї. Нєзнанє, нєстручност и нєобєктивносц орґанизаторох положело на слуп ганьби Русинох Прешовщини.

Слїдуюца "успишна" акция бул 1. Медзинародни Русински бал, котри ше одбул дзень познєйше тиж у хотелу Дукла. По наяви то мала буц наисце интересантна подїя бо була наявена барз добра програма и томбола. Вельке интересованє за русински бал було и у самим Прешове. Интересованє було велько по час док людзе нє дознали чом и пре яку подїю є орґанизовани. На балу було 40 особи од чого 20 учаснїкох конференциї котри лєм закривали празноту богато ушорених столох.

Нє грала анї, по остатню хвильку, наявйована популарна орхестра зоз Чирчу, бо їм орґанизаторе у остатнєй хвильки послали обвисценє же ше бал одказує. Нє було фер анї то же було наявене же главна награда на томболи будзе автомобил Шевролет. То було барз добре здумане. Достац таку луксузну превозку за дробни пенєж и зоз вельо щесца. О таким щесцу велї роздумовали по хвильку док ше нє дознало же ше на томболи тота превозка може достац – алє лєм за викенд. То значи же тот котри на томболи достал першу награду, достал ю лєм на пожичку. Таки приступ орґанизаторох жалосни, иритантни и цо главне губи имидж Русинох у Прешове.

На концу потребне знова указац на факт же Здруженє Русинох Словацкей, нєдавно основане здруженє, котре без було якого сотруднїцтва або пораду зоз одборнїками и постояцим орґанизациями орґанизовали Медзинародну конференцию и бал котри були вишмейованє Русинох. Роздумайме о тим чи така форма роботи интеґрує и доприноши дальшому розвиваню Русинох нє лєм у Словацкей але и ширше, у швеце.

-ЛС-