|
БУКУРЕШТ - ШВЕТОВА РАДА РРЛ Нє прилапена Декларация русинских орґанизацийох Подкарпат'я
БУКУРЕШТ, 10. фебруар 2008. (Рутенпрес) - Шветова рада Руснацох, Русинох, Лемкох ше катоґорично дистанцує од Декларациї асоцияциї русинских орґанизацийох Подкарпат'я, котра обявена 15. децембра 2007. року - заключене на схадзки Шветовей ради, котра од 4. по 6. фебруар отримана у главним городзе Румуниї, у Букурешту. После длугей и озбильней розправи на Шветовей ради, котрей як єй член присуствовал и Дюра Папуґа, предсидатель Рускей матки, оценєте же тото цело Руснацох, Русинох, Лемкох, нє може прилапиц спомнуту Декларацию понеже барз здабе на провокацию, а о тим нєприлапйованю и дистанцованю од Декларациї, Шветова рада поинформує авторох Декларациї, алє и Владу Републики України. На схадзки Шветовей ради у Букурешту виражена и застараносц зоз нєучаствованьом у роботи Шветовей ради представителя Русинох зоз Подкарпат'я, котри нє присусатвовал анї тому остатньому зашеданю Ради у Румуниї. Як Рутенпрес дознава од члена Шветовей ради зоз Сербиї Дюри Папуґового, урядови домашнї остатньому зашеданю Шветовей ради РРЛ у Букурешту було Министерство вонкашнїх дїлох Републики Румуниї. Члени Шветовей ради РРЛ 5. фебруара нащивели и парламент Румуниї, дзе их приял предсидатель Скупштини Румуниї Боґдан Олтеану. У Клубу посланїкох Скупштини Румуниї истого дня отримана и промоция кнїжки Павла Р. Маґочия “Народ нїодкаль”, котра обявена и на румунским язику, после чого домашнї Русини, зоз Переґу Маре, виведли и пригодну културно-уметнїцку програму. На схадзки Шветовей ради начално прилапени Нарис програми за орґанизованє и отримованє Дзешатого шветового конґреса РРЛ, у Сербиї и Горватскей 2009. року, зоз заключеньом же би єдна спомедзи трох планованих пленарних схадзкох Конґреса була отримана у Петровцох, у Републики Горватскей. Точни датум отримованя наступного Конґреса и Штвартого форума младих РРЛ будзе утвердзени после поради Рускей матки Сербиї и Дружтва Руснацох у Републики Горватскей “Руснак”, як предвидзене, по отримованє Рочней скупштини Рускей матки концом того мешаца. Предсидатель Рускей матки Дюра Папуґа Шветову раду поинформовал и о першим означованю и преслави националного швета Руснацох у Сербиї, 17. януара, цо оценєте як барз добри приклад очуваня националного идентитета и афирмованя Руснацох у єдней жеми, з тим вецей же Шветова рада бешедовала и о пририхтованю за наступни попис жительства 2010. року. Як заключене на схадзки Шветовей ради у Букурешту, Пияти биєнале русинско-лемковскей култури будзе отримани 24. и 25. мая того року у Кринїци, у Польскей, дзе би участвовал и музично-фолклорни ансамбл керестурского Дома култури, а РМ предложела и же би ше Конґрес РРЛ учланєл до УНПО - орґанизациї котра заступа интереси народох котри нє члени Зєдинєних нацийох.
(конєц) зам
|
