|
НАШ БИЗНИС ЦО ШЕ
СЛУЧУЄ ФОРУМ
ОГЛАШКИ АРХИВА
ВАШО ТЕКСТИ
РУСНАЦИ НА ИНТЕРНЕТУ |
|
Україна у Европи и у швеце
На єдним медзинародним сходу нєожидано ше отворела розправа о Русинским питаню. У Києве ше 21.02.2004. року зишло вецей як 220 учашнїкох розправяц о нєшкайшим стану України на схдзки наволаней *Україна у Европи и у швеце*. Участвовали представителє 27 жемох, медзи хторима було 24 амбасадоре, як и вецей посланїки українского парламенту. Предсидатель Леонид Кучма послал осем своїх представительох викладац становиска своєй влади. Медзи нїма бул премиєр українскей влади, министер вонкашнїх дїлох, министер правди и його двоме перши совитнїки. Медзи учашнїками зоз швета були бувши америцки державни секретар Мадлен Олбрайт и бувши предсидатель Републики Чешкей Вацлав Хавел. Схадзку орґанизовали Борис Тарсюк, предсидатель комитету за Европски интеґрациї у українским парламенту, бувши кандидат за предсидательа України на програми реформох и Виктор Ющенко, бувши премиєр України. Отримованє схадзки зоз орґанизацию и финансийно помогла Global Fairness Initiative зоз Вашинґтону, хтора, як свойого представителя, на конференцию послала професора Павла Р Маґоча зоз универзитету у Торонту. На пленарней схадзки пошвеценей розправи о одношеньох України зоз сушедним жемами, Павел Демеш, бувши министер медзинародних одношеньох зоз Братислави почал свойо викладанє зоз надпомнуцом же Словацка и Україна маю вельо заєднїцки интереси, нєовисно од того же ше *нє складю на питаню чи Анди Ворхол бул Словак чи Українєц*. Предлужуюци свойо викладанє у озбильнєйшим тону гварел же ше Словачка зоз своїм уходом до Европскей униї 1.05.2004.року нє оградзує зоз новим желєзним муром од державльанох України. У присустве 173 припаднїкох информативних медийох зоз України и 15 других жемох, професор Маґочи винєсол отворено свойо нєскладанє зоз тим Демешовим становиском. Вон наглашел факт же Словачка була перша жем хтора, як будуци член ЕУ заведла визи жительом України. *Правда же кажди українски державлян ма право поднєсц молбу за словацку визу, алє нєнормално висока цена хтора ше муши плациц за ню практично онєможлївює українским державляном, тим зоз Транскарпатскей обласци на першим месце, прейсц прейґ того нового економского мура.* Представителє ЕУ на тото поволали и Словачку и Україну направиц *мехку – преходну* гранїцу хтора их дзелї, допущиц, цо ище важнєйше най би ше режим преходзеня прейґ гранїци утвердзовал нє у централней влади у Братислави и Києве, алє од локалних власцох у погранїчних обласцох. Професор Маґочи далєй наглашел же *Анди Ворхол бул Американєц Карпато-Русинского походзеня, цо значи же його националне походзенє славянске, розличне од словацкого и українского*. *Цо важнєйше*, гварел професор Маґочи далєй, * У Словацкей єст три раз вецей Русинох як Українцох и скоро шейсц раз вецей тих цо бешедую русински, як тих цо бешедую українски.* *Учашнїки на медзинародних схадзкох*, гварел професор Маґочи у предлуженю свойого викладаня, *нємаю право пропаґировац свою мифтолоґию о нєпостояцим Карпато-русинским народу. Заступац таки становиска цалком нєприкладни членом ЕУ хтора ше так барз намага на охрани националних меньшинох нє лєм у жемох ЕУ, алє и у жемох вонка зоз униї.* Демеш на тото одповедол же вон зоз тим нє сцел отвориц *Русинске-Українске контроверзне питанє* и додал же Словачка *щешлїва же за своїх жительох ма Русинох и Українцох.* Розправа ше, медзитим, нє окончела на тим, бо бувши министер вонкашнїх дїлох и бувши предсидатель скупштини Орґанизациї Зєдинєних Народох Ґенадий Удовенко, видно возбудзени и знємирени вишол зоз своїм становиском спрам хторого *Русинске питанє нє на дньовим шоре тей конференциї. Алє я заш лєм мушим повесц же ше Україна опходзи добре ґу Русином, неовисно од того же ше трима становиска спрам хторого Русини представяю субетнос Українскей нациї* закончел бувши дипломата и нєшкайши прихильнїк реформскей ориєнтациї у українскей политики хторей на чолє Виктор Ющенко, процивней политики Леонида Кучми. Нєпредвидзена дискусия о Русинох виволала интересованє медзи дипломатами ЕУ и представительом жемох хтори були заступени, як и медзи векшим числом новинарох зоз швета и України хтори як да нє були свидоми факта же єден самосвойни народ жиє з єдного и другого боку українских гранїцох. Дзепоєдни були глїбоко потрешени зоз обставинами хтори по их зглядох представяю нєприпознаванє людских правох (у тим конкретним случаю право чловека на свой национални идентитет). Становиско України спрам Русинох на тот завод знова наведзене як приклад єй нєшкайших державних ауторитативних тенденцийох. Цо ище вецей дава причини за застараносц, то факт же реформске кридло опзициї у одношеню спрам Русинох заступа таке исте нєдемократске становиско.
Copright Rusyn International Media Center, 2004.
|