|
18.02.2008
Писмо
послате ужгородскому дньовнїку Зеркало
Ви, почитовани панове маце проблеми нє прето же Русини/Руснаци глєдаю припознанє националного идентитету и права хтори им як таким припадаю спрам Повелї ОЗН, европских конвенцийох о чловекових правох и меншинских правох и шлєбодох /кед нє знаце цо то значи, поволуєме вас присц ту гу нам до Войводини да научице цо вам робиц!), алє проблеми маце пре тото же спрам Русинох и дальей запровадзуєце политику коминтерни и КПСС, КПУ. Чи меншини єст чи нет, то ше спатра у реалносци а нє у политичних кабинетох. Русинох було и єст так як и Українцох и Росиянох и Словакох, Билорусох, Полякох, Сербох и других народох славянского походзеня. Дакеди зме шицки були єдно исте, а вец нам ше дражки розишли та зме постали розлични. Ваша политика може преглашовац Русинох як сце, та аж и за субетнос, алє их нє може знїщиц, анї застановиц у намаганьох достац тото цо им припада вшадзи у швеце, так як и Українцом.. Випатра же ви там панове києвски нїч нє научели зоз того цо ше ту збуло зоз бувшу Юґославию и дзепоєднима другима жемами - а воно гутори же хто нє знал сам ришиц свойо проблеми, пришли други з вонка му ришиц, хто национални меншини нє припознал дзечнє, мушел их припознац под прициском з вонка, хто им нє дал културну автономию, бул им примушени дац териториялну автономию, хто им нє сцел дац анї тото, случело му ше же им мушел дац нєзависносц. Та припознайце цо скорей своїм Русином шицко тото цо им припада, вони нє глєдаю сецесию, вони нє розбиваю Україну, ви зоз тим змоцнїце Україну, та ище кед и нас ту охабице на миру бо ми шицко тото ту маме од 1919. Цо скорей припознаце, то лєпше за Русинох там и у швеце, за Українцох и за українску державу.
З найлєпшима жаданями за вас шицких, Михал Горняк, Беоґрад, Сербия
|
